Après uèch meses de viatge a bòrd d’una fusada Atlas de la NASA, lo veïcul robotic Curiosity ja es arribat sus plaça, dins lo Cratèr Gale de la superfícia de Mart. Ièr a 7h32, coma èra previst, s’èra pausat sus la Planeta Roja. L’aparelh es grand coma una veitura, pesa qualques 900 quilogramas e a costat de 2,5 miliards de dolars. “Sèm tornarmai sus Mart. Es incresable”, çò diguèt, plen d’euforia, lo director de la NASA, Charles Bolden.

Amb un messatge sus Twitter, a 7h32, la NASA confirmèt l’aterratge de l’aparelh: “Soi salve e segur sus la superfícia de Mart. Cratèr Gale, soi aicí!”

Curiosity a una longa mission de far, de qualques dos ans, que percorrerà la superfícia marciana en analisant de mòstras de ròcas e que serà en cèrca d’aiga, un dels principals indicis de la probabla existéncia de vida.
 
La clau de l’aterratge, la manòbra mai riscada de tota la mission, comandada dempuèi 570 milions de quilomètres de distància, èra çò que la NASA apelava las “sèt minutas de terror”. La manòbra èra fòrça complèxa per se destacar de la fusada que lo portava e per aterrar sul luòc seleccionat, lo cratèr Gale, ont los scientifics creson que i aguèt d’aiga fa de miliards d’ans. Caliá la participacion de certanas sondas qu’orbitavan ja a l’entorn de Mart. Es lo cas d’Odissey, que vira a l’entorn d’aquela planeta dempuèi 2001, e que fins a la setmana passada s’èra pas replaçada sus l’orbita corrècta après se n’èsser desviada leugièrament.
 
Odissey es importanta per la NASA perque es l’observador qu’a determinat que Curiosity es arribada a destinacion e en quin estat. Doas sondas de mai an enviat de donadas de l’operacion: Mars Reconnaissance Orbiter de la NASA e Mars Express de l’Agéncia Espaciala Europèa (ÈSA).
 
Coma d’abitud dins totas las missions estatsunidencas, la NASA fa un bon seguiment en linha del fach, per vidèo, Facebook e Twitter.