Après lo renovelament dels bilhets de 5 èuros e de 10 èuros, dimècres se metèt en circulacion dins los païses de l’Eurozòna los nòus bilhets de 20, amb d’elements de seguretat sofisticats per ne dificultar la falsificacion.
 
D’un costat, lo procès especial d’estampatge dòta los bilhets d’un tocar diferenciat. E, d’un autre, al delà d’un numèro verd esmerauda e d’un dessenh d’Euròpa en filigrana, i a una “fenèstra amb retrach” inserida dins l’olograma: quand s’agacha lo bilhet a contralutz, la fenèstra ven transparenta e mòstra un retrach del personatge mitologic d’Euròpa, dels dos costats del bilhet.
 
“Es una vertadièra innovacion tecnologica”, çò diguèt lo president de la Banca Centrala Europèa (BCE), Mario Draghi, pendent la presentacion del nòu bilhet. Aprofechar las avançadas de la tecnologia es una de las rasons que justifican l’actualizacion periodica dels bilhets, segon Draghi, coma ne manténer tanben l’integritat.
 
Lo nòu bilhet de 20 èuros es la tresena denominacion de la sèria Euròpa, après los de 5 e 10 èuros, que son remplaçats dempuèi la primièra emission de 2002. D’ara enlà se cambiarà gradualament los de 50, 100, 200 e 500.