Vos es arribat qualque còp qu’òm vos blòque lo compte de Facebook o Twitter, qu’òm vos aja escafat un vidèo o una fòto, o quitament qu’òm vos aja eliminat un comentari dins Jornalet? S’es aital, benlèu vos intèressa d’o senhalar a l’Online Censorship (la Censura en Linha), un nòu sit web que ven de l’inaugurar l’Electronic Frontier Foundation (EFF, la Fondacion de la Frontièra Electronica), una fondacion consagrada als dreches numerics. Los rets socials son de mai en mai presents dins la nòstra vida vidanta e partejam d’informacions constantament sus la tela, debatèm d’afars e nos engatjam dins de campanhas suls rets socials. Cal pas desmembrar que las societats privadas coma Facebook, Twitter, Instagram o Google impausan lors nòrmas e sistèmas de contraròtle dels contenguts.
 
Amb l’Online Censorship, l’EFF cèrca de convéncer aquelas companhiás de trabalhar amb mai de transparéncia e responsabilitat a respècte dels usatgièrs quand prenon de decisions sus la regulacion dels contenguts.
 
Lo mond qu’ajan experimentat qualque sòrta de blocatge dels grands rets socials pòdon emplegar aquel esplech novèl per o senhalar. Tota l’informacion amassada deu servir, segon l’EFF, per descobrir çò que se censura o se retira e sustot per ne saber la rason.