Las perquisicions que se fan al país dins l’encastre de l’estat d’emergéncia an tocat tanplan los mitans revolucionaris, aternatius, ecologistas e libertaris. Dijòus passat, 26 de novembre, la polícia intrèt dins los domicilis de qualques militants anarquistas en Peiregòrd, quitament en enregistrant lors donadas informaticas e en fotografiant lors domicilis, segon çò que rapòrta Alternative Libertaire. Aquel sit anarquista rapòrta que l’operacion foguèt ordenada pel prefècte del departament de Dordonha e que s’agiriá “d’utilizar l’estat d’emergéncia per dissuadir la contestacion de la COP21”, la conferéncia que se ten ongan a París sul cambiament climatic.
 
De fach, segon Politis, son plusors las perquisicions que se son fachas en cò de militants ecologistas, mai que mai en cò de ciutadans pròches de la lucha contra la construccion d’un aeropòrt a Kernitron al Lann (Bretanha). Politis rapòrta que sièis militants son estats assignats a residéncia.
 
E Reporterre alarga aquela informacion. Al nivèl estatal, la polícia a fach, en doas setmanas, 1616 perquisicions administrativas e aperaquí 300 ciutadans son estats assignats a residéncia. An creat una pagina web per recensar los cases.