Dins l’encastre del plan de seguretat refortida, lo ministre francés de l’Interior, Manuel Valls, anoncièt a la fin de julhet la creacion de 60 zònas de seguretat prioritàrias (ZSP) dins l’Estat francés, e que n’auràn desplegat 15 de setembre enlà. D’aquelas 15, sabèm que tres seràn en Occitània.

Las tres zònas occitanas son dins los departaments de las Bocas de Ròse, Gard e Erau. Exactament s’agís dels Quartièrs Nòrd de Marselha (País Marselhés); de Gardana e Boc Bèl Èr (País d’Ais); de Vauverd, Lunèl e Sant Geli (Costièra de Nimes); e de Mauguiò (Montpelhierenc).
 
Amb aquelas zònas, que son una de las promessas de campanha de François Hollande, s’agís d’aviar una “accion de seguretat refortida dins de territòris caracterizats per una delinquéncia enrasigada”, aviá indicat lo ministre de l’Interior, Manuel Valls, al mes de junh.
 
Las “15 ZSP son estadas predefinidas, al nivèl central, en foncion de critèris objectius de gravetat”. “L’idèa es d’esquichar ont cal, per çò que cal, amb agilitat, adaptacion”, çò apondèt lo ministre.
 
Aquelas zònas “cobriràn pas obligatòriament d’espacis omogenèus e poiràn tànher las vilas sensiblas (amb d’episòdis recurrents de violéncias urbanas), los centres de vilas que lor fisionomia es degradada e las zònas periurbanas o ruralas.”
 
Per aviar lo sistèma, lo ministèri de l’Interior deurà emplegar una part de las plaças suplementàrias previstas: polícia e gendarmariá partejaràn 1000 plaças annalas. Segon lo ministre serà pas pro, e se definirà de redesplaçaments per las ZSP.