Tocant la Cima del Clima (CÒP21) que se debana a París, lo collectiu anglés Brandalism a inventat una engenhosa campanha per metre en evidéncia lo doble jòc de fòrça societats qu’esponsorizan la reünion mondiala impulsada per l’ÒNU. En utilizant lor nom, un jòc de mots entre “brand” (marca) e “vandalisme”, un ochantenat d’artistas de carrièra convocats per aquel grop “an adobat” aquesta dimenjada passada una seguida de publicitats d’aquelas societats, presentas per carrièras a París.
 
Segon Brandalism, aquestes darrièrs jorns an plaçat sièis cents afichas publicitàrias amb de messatges leugièrament modificats de marcas coma las automobilas Volkswagen, lo petròli Total, l’aerolinha Air France e los produches quimics Dow Chemicals. Son estats tanplan parodiats los espacis publicitaris de la societat JC Decaux, esponsor oficial de la CÒP21, e mai una seguida de caps d’estat coma François Hollande, David Cameron, Barack Obama, Angela Merkel e Shinzo Abe.
 
Joe Elan, del collectiu Brandalism, o justificava dins un comunicat: “En esponsorizant las negociacions climaticas, de societats que polluisson fòrça coma Air France e Engie se pòdon vendre coma se faguèsson partida de la solucion del cambiament climatic, e mai se fan partida del problèma”. Amb l’accion, an volgut denonciar “la dominacion completa de las multinacionalas sus las negociacions de la reünion de la CÒP21”.