Del temps qu’Euròpa se revelha de la cachavièlha terrorista, los Estats Units e l’armada iraquiana assajan de conquistar primièr la vila de Ramadi pr’amor que l’objectiu es plan mai grand: Mossol. Mas las defensas dels militants de Daish son pro fòrtas. Dins la vila de Sinjar an de tunèls sens fin e en Sawija an de muralhas de 10 mètres de naut. E mai, totes los alentorns an de camps de minas, amb de mitralhièras, de mortièrs e tanben de fanatics suicidas plens de bombas.

En Siria, al front èst, de russes e de franceses bombardan jorn après jorn las defensas dels extremistas islamics. I a de mòrts encara e las nòvas arriban plan melhor en Euròpa. Mas ailà, dins la vila iraquiana de Ramadi, se vòl ensajar de conquistar de territòris, pauc a cha pauc, d’un biais mai segur.
 
Lo califat de Daish a mesclat dos tipes de guèrra; l’insurgéncia e las tacticas militaras. Aquò vòl dire d’explosius e de bombas pertot, mas tanben la guèrra de trencadas. A Ramadi solament, i a, segon l’intelligéncia estatsunitenca, aperaquí 400 combatents de Daish e benlèu de centenats d’auxiliars de mai, mas los iraquians e los estatsunidencs i vòlon donar un còp. Vòlon conquistar Ramadi amb mai de 10 000 soldats, mas Daish a de franctiraires, de mitralhièras e de mortièrs e aquò es una plan bona muralha.
 
 
L’ajuda estasunidenca es arribada
 
Los estatsunidencs an ajudat l’armada iraquiana amb de buldozèrs armats e tanben de veïculs que pòdon passar sus las minas. Tanben an mandat de drònes qu’espian lo territòri del califat cada jorn. Mentretant, los combatents de Daish s’amagan e demandan ajuda a Dieu contra los infidèls.
 
L’armada iraquiana a lançat dempuèi los avions de tractes per la populacion civila de Ramadi. Los papièrs los convidan a evacuar la vila abans 24 oras. Es un senhal clar que l’assaut de l’armada iraquiana es imminent. E que poiriá donar una victòria plan bona a l’armada iraquiana pr’amor que n’a pas agut cap dempuèi julhet de 2014. E mai s’es possible de conquistar lèu Ramadi, totes los militars dison que conquistar l’objectiu seguent, Mossol, serà una autra istòria plan desparièra.
 
“Quan defendon un territòri, o fan d’una manièra pro eficaça e es malaisit de i luchar”, çò ditz Derek Harvey, un agent d’intelligéncia estatsunitenc que trabalha amb l’armada d’Iraq. “An de defensas prigondas de tal biais qu’es plan malaisit de ganhar la batalha. Mentretant, fan de manòbras de distraccion en d’autres luòcs per ganhar temps o tornar conquistar çò perdut”.
 
Mas ara l’estrategia dels Estats Units e d’ensajar de forçar Daish de decidir quina vila es mai importanta: Tal Afar, Raqqa o Mossol. L’armada estatsunidenca vòl conéisser aital qual es lo ponch feble de Daish. Saber per ont pòdon atacar amb mai de fòrça. Donc: l’atac a Ramadi.
 
Aquela ofensiva militara sus aquela vila es solament un primièr objectiu. Après i a Mossol, una vila que Daish ten dempuèi 2014 e que los servicis d’intelligéncia confirman que serà pas de bon conquistar.
 
L’intelligéncia estatsunidenca tanben confirma que i a de senhals de feblesa dins Daish vèrs aquel front, lo front oèst: l’argent que los combatents recebon es estat reduch al 50%. E dempuèi l’atac d’una preson en Hawija —ja reportat dins Jornalet— totes los presonièrs son estats menats a Mossol.
 
E mentretant divèrses senators estatsunitencs demandan mai de soldats en Iraq: l’armada d’aquel país es preparada per lançar l’ofensiva sus Ramadi amb l’ajuda dels Estats Units. Es una ofensiva que sembla imminenta e que fariá que, lèu, Daish seriá pas pus tan fòrt coma èra.
 
 
 
 
Christian Andreu