Drama a Folaironas (Sèrras d’Agenés) après l’assassinat ièr de matin d’un parelh d’aperaquí quaranta ans. Eric Simon e Stéphanie Marcassa son estats aucits aqueste matin a còps de fuòc davant lo garatge de lor ostal quand s’aprestavan a menar los dos enfants, de 5 e 10 ans, a l’escòla.
 
Los enfants an vist lo crime e se son amagats còp sec, un dins los camps dels alentorns e l’autre dins l’ostal d’ont a apelat los secorses. Puèi los an menats a l’espital d’Agen, en “estat de chòc” segon de fonts pròchas de l’enquèsta. Quant a las victimas, Stéphanie Marcassa trabalhava dins un gabinet d’arquitèctes a Agen e son òme, Eric Simon, exercissiá una profession liberala, segon çò que rapòrta Sud Ouest.
 
La polícia recèrca activament un individú que fugiguèt dins una veitura de color fosca. Segon lo testimoniatge d’un dels enfants, un òme encagolat tirèt de la veitura estant e fugiguèt.
 
Per ara las ipotèsis van d’una temptativa de cambriolatge que se seriá mal passada a una venjança, segon La Dépêche, que rapòrta que, segon los servicis de la gendarmariá, l’òme assassinat seriá conegut coma “victima” dins l’encastre de l’exercici de son mestièr d’artisan.


#foulayronnes tuits