L’enquèsta sus la fusilhada que se passèt dimècres passat a San Bernardino (Califòrnia), e que costèt la vida de 14 personas, es estada requalificada en “acte de terrorisme” per la polícia federala estatsunidenca, çò rapòrta Los Angeles Times. Las autoritats creson que l’atac poiriá èsser inspirat per l’Estat Islamic e mai se creson que los assalhidors recebèron pas d’òrdres dirèctes de l’organizacion jihadista per far lo masèl. La femna, que faguèt l’assassinat acompanhada de son marit, aviá jurat fidelitat al cap de l’Estat Islamic, Abu Bakr Al Baghdadi, a travèrs de Facebook. Ela o faguèt pas amb son nom mas amb un escais, çò an raportat de fonts de l’enquèsta qu’an pas precisat cossí son arribats a aquela conclusion.
 
Lo chaple se passèt dimècres passat. Syed Rizwan Farook e sa femna Malik intrèron dins un centre d’assisténcia als andicapats e comencèron de fusilhar lo mond en tuant 14 personas e en ne ferissent 17. Puèi la polícia tuèt lo parelh assassin. La polícia trobèt en cò d’eles 12 bombas artisanalas e creson que l’atac èra planificat.
 
Syed Rizwan Farook èra ciutadan dels Estats Units e sa femna Malik èra nascuda en Paquistan. Ela, èra tornada dins son país d’origina, fa aperaquí cinc ans, per far sos estudis de farmacia dins l’Universitat de Femnas de Multan.