Fòra lo parlament britanic, dimècres d’aquesta setmana i aviá de milièrs de manifestants que sonavan de brams contra la guèrra. Se sabiá que los deputats britanics anavan votar la rintrada del Reialme Unit dins la guèrra que, dinc a uèi, la manten solet l’estat francés contra Daish.
 
Dins lo parlament britanic tanben i aviá de brams. La discussion demest los partisans d’intrar en guèrra oficialament contra Daish e lors detractors, tanben èra fèra. La demanda del primièr ministre britanic David Cameron èra escotada per totes los presents.
 
“O ben anam luchar contra los terroristas dins lo lor territòri qu’es ailà que planifican de tuar de britanics, o ben demoram d’èsser atacats aicí, dins lo nòstre país”, çò diguèt Cameron. Dempuèi, lo bolh parlamentari  cresquèt e divèrsas voses clamèron contra e per la guèrra. La discussion èra fòrça devesida, tant dins coma fòra l’edifici del Parlament. Mas Cameron contunhèt.
 
“Lo perilh es plan real,” çò confirmèt, “la question es: s’avèm de trabalhar amb los nòstres aliats franceses o demorar d’èsser atacats?” Fin finala, lo vòte aprovèt l’intrada en guèrra oficiala del Reialme Unit amb l’estat francés a partir del dimècres 2 de decembre de 2015. D’oras puèi, divèrses avions militars britanics bombardavan ja simbolicament lo territòri de Daish en Siria.
 
 
Una lucha contra lo bellicisme
 
Dempuèi 2003 la situacion a plan cambiat dins lo Reialme Unit. S’ara s’es aprovat l’intrada en guèrra per 397 vòtes contra 223, la situacion politica es pas coma fa solament 10 ans. Lo meteis partit laborista, que totjorn s’es plaçat contra lo bellicisme, a agut de laissar lo vòte liure  als sieus deputats per evitar de discussions encara mai grandas.
 
Lo quite David Cameron es conegut dins lo Reialme Unit per pensar pas jamai a de conflictes gurrièrs. Fins a la sieuna darrièra victòria, ont aguèt la majoritat absoluda. Dempuèi aquò a incrementat la despensa militara del 2% al 3% , e a començat de crompar d’avions F-35, e mai a fach mai grand encara lo budget britanic per aver de sosmarins nuclears. E tot aquò solament dempuèi lo mes de mai de 2015. E s’abans non voliá pas parlar de guèrra en Iraq o Afganistan, ara defend l’onor britanic e la sieuna seguretat un autre còp.
 
“Ja sèm de fach en guèrra e fa longtemps,” çò ditz un ancian ministre anglés que vòl èsser anonim, “l’accion de guèrra de uèi es mai simbolica que reala mas Rubicon foguèt passat ja fa longtemps, e pas per nosautres. Ara cal demostrar que lo Reialme Unit es demest los primièrs dins la lucha contra lo terrorisme”.
 
Lo Ministèri de la Defensa britanic ja a confirmat que mai de quatre Tornados britanics sortiguèron de la basa de la RAF a Akrotiri, en Chipre, per bombardar de posicions miltaras de Daish en Siria. Ara cal demorar per veire s’aquela accion es solament simbolica, coma ditz l’ancian ministre, o ben se l’aliança europèa contra la terror a, uèi, un aliat de mai amb lo Reialme Unit.
 
 
 
 
Christian Andreu