Jean-Claude Petitfaux, mes en examen divendres de ser per l’assassinat d’un parelh davant sos enfants, a Folaironas (Sèrras d’Agenés), se suicidèt dissabte passat dins sa cellula a la preson d’Agen. Los agents de l’administracion penitenciària lo trobèron penjat a 20h30 e donèron l’alèrta, mas los pompièrs e lo SAMU capitèron pas a lo reanimar e constatèron lo decès. O rapòrta Liberation, que cita l’AFP.
 
Petitfaux, que foguèt empresonat dins la nuèch de divendres a dissabte, èra mes en examen per “murtres agravats, temptativa de murtre agravat e extorsion amb arma”. Èra estat interpelat “sens opausar de resisténcia”, dijòus, l’endeman dels faches, sul pargatge d’un supermercat d’Agen, après 24 oras de fugida.
 
Qualques oras abans son suicidi, son avocata d’ofici, Élodie Séverac, aviá indicat a l’AFP que son client aviá confessat lo crime e sabiá qu’encorriá la reclusion criminala a perpetuitat.
 
Petitfaux èra lo principal sospièch de l’assassinat d’Eric Simon e Stéphanie Marcassa, aucits dimècres passat de matin a còps de fuòc davant lo garatge de lor ostal quand s’aprestavan a menar lors dos enfants, de 5 e 10 ans, a l’escòla.
 
Los enfants vegèron lo crime e s’amaguèron còp sec, un dins los camps dels alentorns e l’autre dins l’ostal d’ont aviá apelat los secorses. Puèi òm los menèt a l’espital d’Agen, en “estat de chòc” segon de fonts pròchas de l’enquèsta.
 
Petitfaux aviá trabalhat dins una entrepresa de bastiment e òbras publicas a Agen, una entrepresa que la victima Eric Simon n’èra responsable. Sembla que lo presumit assassin auriá menaçat qualques còps la victima en seguida de l’accident de trabalh qu’un companh de trabalh patiguèt en 2008, çò rapòrta France 3 Aquitània.