Aquesta dimenjada, pas de marcaflume dins las partidas d’Elèit 1, mas de rescontres plan disputats.

Lesinhan capvira la situacion
 
Dissabte, Vilanuèva opausèt una brava resisténcia als Broncos de Tolosa, mas perdèt un còp de mai: 30-22. A Albi, los locals e Avinhon marquèron cadun dos ensages, mas una transformacion e una penalitat de Decarnin faguèron la diferéncia en favor dels Tigres tarneses: 12-8.
 
Dimenge, Limós faguèt plegar Palau 38-22. Al Molin, la partida èra importanta per preveire una plaça dins lo trio de cap e doncas la qualificacion pel grop bèl de la segonda fasa. Los lesinhaneses s’èran fait brandir las pelhas aprèp la desfaita contra Palau 23-20. Ça que la, dins lo primièr temps, se faguèron prene de velocitat pels Dragonets que menavan 22-8 a la pausa. L’alièr local Poggi marcava tre la represa, mas Marginet rajustava un ensag pels catalans (28-14).
 
A la 54a minuta, la saca de carpans se dobriguèt e l’arbitre sortiguèt un roge e un jaune pels catalans e un roge pels audencs. Novèl ensag audenc qu’un pilar catalan preniá mal: e novèl carton roge! Lesinhan va marcar dos còps per menar 30-28, mas l’alièr Sigismeau ziga-zagueja dins la defensa verda per tornar balhar l’avantatge als sang e aur: 34-30. Dins las cinc darrièras minutas, lo centre Cardace torna trapar sas cambas de fuòc (coma quand portava lo malhòt dels Dracs) per escapar a la defensa catalana e atal puntar l’ensag de l’egalitat, puèi l’ensag de la victòria: 40-34. Una darrièra ataca catalana sul còp de pè de remandadís se clavava sus un enabans e sus la còrna. Amb aquela victòria de Lesinhan, tornam trapar las tres formacions audencas en cap del classament.
 
 
Al programa de la dotzena jornada
 
Totas las partidas de la dotzena jornada se jogaràn dimenge de vèspre: un dèrbi catalan Palau-Dragonets; Carcassona recebrà Albi; l’EO Avinhon aculhirà los Broncos de Tolosa sus la pelena sintetica de Sant Ruf e Lesinhan ensajarà de confirmar son reviscòl a Vilanuèva.
 
 
Qualificacions per la Copa del Mond
 
L’ancian jogaire de Carcassona e capitani de la formacion americana, Mark Offerdhal, a marcat lo primièr ensag de la victòria de son esquipa contra Jamaica: 20-14. Canadà pren tanben part a aquel torneg a tres que veirà lo venceire qualificat per la Copa del Mond de 2017.
 
 
 
 
Alan Roch