La presidenta del Front Nacional, Marine Le Pen, se deurà explicar la setmana que ven davant lo Parlament Europèu per fraudariá al vòte, segon una informacion que publiquèron dimècres dins"Les Échos en exclusiva. Segon aquela informacion, la cap del partit xenofòb es estada convocada pel president de l’Eurocambra, Martin Schulz, per s’explicar sus de suspicions de fraudariá al vòte. “De personas an votat en plaça de Marine Le Pen, aquò es contrari al reglament. Son de faches trebolants que los cal esclarzir”, çò ditz una font parlamentària segon Les Échos.
 
Aquela acusacion contra la cap ultradrechista remonta al mes d’octòbre passat, dins una sesilha longassa que los Eurodeputats i examinavan d’emendaments un a cha un. Après doas oras, Marine Le Pen se fatiguèt e quitèt l’emicicle, mas estranhament se contunhava d’enregistrar de vòtes en son nom. Lo populista olandés Marcel de Graaf reconeguèt s’èsser substituit a la cap ultrafrancista, mas lo deputat frontista Nicolas Bay o nèga, e mai se cinc parlamentaris juran de l’aver vist qu’o fasiá. “Esperam d’explicacions per saber se se seriá pogut donar d’instruccions”, çò apond la font parlamentària que cita Les Échos.
 
Es pas lo primièr conflicte que lo partit de l’ultradrecha francista ten amb lo Parlament Europèu. La prima passada, Martin Schulz demandèt una enquèsta per l’engatjament de 20 assistents parlamentaris, qu’en realitat trabalhan per las estructuras del Front Nacional a París. E en 2013, l’Eurocambra levèt a Marine Le Pen son immunitat parlamentària perque lo parquet de Lion (Arpitània) aviá dobèrt un enquèsta contra ela per incitacion a l’òdi racial.