L’Institut Francés de l’Opinion Publica (IFOP) a publicat un resumit de quatre dels sieus estudis faches en Corsega entre los ans 1975 e 2012. Lo sintèsi s’es facha a partir dels quatre sondatges que se faguèron dins l’illa just après quatre eveniments clau: los faches d’Aleria de 1975, l’assassinat del prefècte Claude Erignac en 1998, l’incendi del restaurant Chez Francis en 1999 e las eleccions legislativas de junh passat. Lo resumit, segon l’IFOP, es estat publicat ara per coïncidir amb las Jornadas Internacionalistas de Corti.

Lo primièr estudi, fach en 1975, permet de comprene las causas de la frustracion còrsa per rapòrt als immigrants franceses e particularament als pènegres. Dins aquel sens, 63% considèran que l’enrasigament dels pènegres capitèt mercés al fach que comptèron amb lo sosten institucional e economic que la populacion còrsa recebiá pas. Aquò explica un estat d’esperit còrs basat sus l’ofensa de la comparason; çò qu’ajudèt, en partida, a l’espelida del nacionalisme militant còrs, d’en primièr per mejan de l’Accion Regionalista Còrsa (ARC) e après amb l’FNLC.
 
Quant a l’independentisme, la darrièra enquèsta, facha qualques jorns abans las eleccions legislativas de junh d’ongan, ditz que 12% de la populacion son per l’independéncia de Corsega. Aquela chifra pòt semblar excessivament bassa se prenèm en compte la fòrça electorala del nacionalisme còrs, mas se cal avisar que la primièra enquèsta, facha en 1975, indicava que solament 2% dels còrses volián l’independéncia per l’illa. En consequéncia, las donadas afirman que l’independentisme s’es multiplicat per sièis en mens de quaranta ans. Lo sondatge de 1998 establissiá que l’independentisme aviá ja pujat fins a 6% dels enquestats.
 
Çò que faguèt créisser fòrt lo sentiment independentista foguèt lo prefècte Bernard Bonnet, successor d’Erignac, qu’empleguèt de metòdes illegals contra lo nacionalisme còrs. Bonnet —qu’aviá ja servit la Republica Francesa d’un biais polemic quand foguèt prefècte en Fenolhedés e Catalonha del Nòrd, çò es dins los Pirenèus Orientals— foguèt restacat a la destruccion del restaurant Chez Francis, e aital venguèt lo primièr prefècte francés condemnat après la Segonda Guèrra Mondiala. La siá accion gaireben doblèt lo sentiment independentista, çò que menèt en partida l’Estat francés a negociar los Acòrdis de Matignon. Dins aquel sens, après lo passatge de Bonet per l’illa, lo sentiment independentista pogèt de 6% a 10%. Un bilanç plan trist per un servidor de la Republica Francesa, çò auràn plangut a París. Tot bèl just, pendent la negociacion dels Acòrdis de Matignon, en l’an 2000, lo sentiment independentista arribèt al sieu maxim istoric: 14%.
 
Ça que la, e en parallèl a aquel sosten creissent a l’opcion independentista, lo nacionalisme còrs ofrís un imatge fòrça ligat a las actituds mafiosas. Aquela percepcion sociala se pòt veire plan clarament dins lo sondatge fach après l’assassinat del prefècte, quand 54% dels enquestats o percebián. Aquela percepcion se manten invariabla, per exemple, dins lo sondatge de junh d’ongan.