François Bayrou, primièr cònsol de Pau e president del Movement Democrata (Modèm), foguèt present diluns passat a la “batejada” dels novèls ensenhaires de las Calandretas formats per l’establiment Aprene. Aquela “batejada”se debanèt a Pau. Bayrou, qu’es èx-ministre de l’educacion estatala francesa, faguèt de declaracions d’amor a la lenga occitana e s’engatgèt a se batre per defendre las lengas mal nomenadas regionalas al collègi, çò rapòrta La Setmana.
 
Bayrou aguèt de paraulas duras contra la reforma del collègi que deu intrar en vigor dins la rintrada de 2016 e que relèga l’occitan e d’autras matèrias als novèls “ensenhaments practics interdisciplinaris” (ÈPI). E mai se Bayrou aviá ja mostrat son oposicion a aquela reforma, sustot tocant los corses de latin e de grèc, diluns s’engatgèt per las lengas nacionalas coma l’occitan. “Qu’ac harèi tà las lengas regionalas e tà las lengas de las «umanitats» per’mor qu’ei la medisha causa! Lo bearnés, gascon o occitan b’ei latin parlat vint sègles puish!”, çò apondèt.
 
Per Bayrou, la lenga occitana es un “tresaur”, “ua faiçon de véser lo mond”, e quitament  “un ligam dab la lenga latina” qu’el estudièt dins sa formacion en letras classicas; e encara l’occitan èra la lenga de son paire que moriguèt quand el èra jove.
 
 
 

---

La Setmana: Reforma deu collègi: François Bayrou que s’engatja