S’inaugurèt dimars a Bamako (Mali) l’acadèmia Solektra per l’energia solara. Es una inciativa del cantaire e compositor estatsunidenc Akon, que fa de rap e d’RNB e qu’a decidit d’emplegar l’argent qu’a ganhat dins sa carrièra musicala per melhorar las condicions de vida de las gents en Africa amb un projècte que deu portar l’electricitat a 600 milions de personas. L’artista nasquèt a Saint Louis, en Missorí, mas tre sa naissença e fins a sos sèt ans visquèt en Senegal abans que sos parents repartiguèrsson pels Estats Units. El se remembra plan de son enfança sens electricitat e, per tant, lancèt l’iniciativa Akon Lighting Africa, amb la tòca de fornir qualques centenats de milions de personas d’Africa en electricitat gràcias a l’energia solara.
 
En mens de dos ans, Akon Lighting Africa a creat una dinamica sens precedents en favor de l’electricitat en Africa, çò rapòrta Le Point Afrique. Akon amb sos collaboradors Thione Niang e Samba Bathily an mes en plaça aquel projècte que cèrca de portar l’electricitat als 622 milions de personas africanas qu’an pas cap d’accès a l’electricitat, en cercant una font mai accessibla e mens cara. Lo solar es l’energia neta mens cara del mercat e es disponibla tota l’annada per tot lo continent, coma o confirmèt la CÒP21, que l’iniciativa i participèt.
 
 
D’installacions d’electricitat e d’aiga dins 15 païses
 
Après vesitar ongan un quinzenat de païses en se reünissent amb d’elegits e d’entrepreneires locals, ara passan a una estapa mai larga. Facilitan l’accès a l’aiga gràcias als sistèmas de pompatge solar e installan l’electricitat un pauc de pertot. A l’encòp favorizan la creation d’escòlas que permeton als africans de venir los actors de lor pròpri desvolopament, en tot formar la relèva de deman. 



Akon Lighting Africaper lepointafrique