L’Escòla Occitana d’Estiu (EOE), s’agís d’una setmana de convivéncia dins una residéncia que fa d’escòla e de lotjament a l’encòp, a Vilanuèva d’Òlt (Naut Agenés). Tot se fa solament en occitan per çò que l’EOE es una bona escasença de far d’immersion lingüistica.

Çò de mai important de l’EOE son los corses de lenga occitana dins totes los nivèls e dialèctes. Al delà, lo programa compren un molon d’activitats: de talhièrs, de conferéncias, d’espectacles, de danças, de descobèrtas pel terraire e una librariá completa de libres en lenga nòstra.
 
Los participants son normalament d’occitans que venon de pertot dins lo país, seguits per un grop de catalans plan nombroses. Al delà, i a de mond de païses ben divèrses, quitament de japoneses e de colombians.
 
A l’EOE i a de mond de totes los atges, çò que fa que los escambis entre dialèctes e generacions son passionants, mai que mai en tot beure un còp a l’estanquet, a la fin de la jornada, abans lo balèti o l’espectacle.
 
Pels mai pichons i a l’Escoleta, amb d’activitats per enfants de 5 a 10 ans, e per lo jovent d’11 a 16 ans i a l’Escòla dels Adolescents (dicha “Escòl’Adòs”). Ongan, faràn dels jornalistas e, entre lo 12 e lo 18 d’agost, mandaràn de reportatges, de vidèos e de fòtos a Jornalet.
 
Coma d’abitud, lo Comitat d’Afrairament Occitanocatalan (CAÒC) i serà, en tot portar fòrça participants. Lo CAÒC collabòra activament a l’organizacion de l’EOE en portant, a mai, de professors de catalan e lo grop de musica Riu per la fèsta occitano-catalana.