Lo 20 de decembre que ven i aurà d’eleccions legislativas dins l’estat espanhòl, que los ciutadans i causiràn los deputats e los senators. Ara, dins una campanha electorala marcada pels nombroses cases de corrupcion, per l’irrupcion de nòus partits politics e per lo procès d’independéncia de Catalonha, se passan d’anecdòtas de tota sòrta.
 
Dimècres passat, lo president espanhòl en foncions foguèt victima d’una agression. Un jove li donèt un còp de ponh mentre que Rajoy se passejava per carrièras de Pontevedra (Galícia). Totun, es pas aquela anecdòta que nos a atirat l’atencion, mas una autra plan mens condemnabla.
 
Fa quatre ans, just abans las eleccions espanhòlas anterioras, un jove qu’a nom Rubén Aranguren e qu’alavetz aviá quinze ans s’adreicèt per Twitter al compte oficial de Mariano Rajoy, president del país e candidat a la presidéncia, en li demandant ont podiá trobar lo programa electoral del PP. Rajoy li respondèt amb mesprètz: “15 ans? Que vos sembla s’esperam un pauc per debatre de politica? Mercés”, çò fiulèt Rajoy.
 

@Rubeen_69, 15 años? qué le parece si esperamos un poquito para debatir sobre política? gracias.

— Mariano Rajoy Brey (@marianorajoy) 25 novembre, 2011

 
Ara lo meteis jove, qu’es desenant dins sos dètz e nòu ans, a remembrat aquela fiulada de Rajoy en li disent: “Que vos sembla se debatèm ara de politica? Ara soi pro grand? Me mespresèretz a 15 ans. Lo 20 de decembre comptes pas amb lo mieu vòte”.
 

@marianorajoy Que le parece ahora debatir sobre politica? Ya tengo edad suficiente?

— Ruben Aranguren (@Rubeen_69) 14 desembre, 2015

 

@marianorajoy Me despreciaste con 15 años, el #20Dic no cuentes con mi voto.

— Ruben Aranguren (@Rubeen_69) 14 desembre, 2015