Carcassona-Lesinhan al pè de l’avet
 
Dissabte, es amb una esquipa remodelada que l’AE Carcassona joguèt a Tolosa; cal dire qu’al pè de Ciutat es la crisi del lotjament a l’infirmariá: aitant de jogaires nafrats coma de disponibles! Los Canaris optèron per una circulacion maximala de la palma e ganhèron aisidament en marcant un dotzenat d’ensages: 58-14.
 
A Albi, Limós prenguèt los davants (22-10 a la pausa). Los Tigres tarneses getèron totas sas fòrças dins la batèsta, mas daissèron la victòria als Blanquetièrs: 30-26.
 
Dimenge, pas de dificultats pels Dragonets per batre Vilanuèva, 54-7, mentre qu’al Molin, Lesinhan se trucava a una formacion d’Avinhon que se mostrèt mai dinamica, mai jogaira e mai collectiva. Los provençals menavan 18-12 a la pausa e mestregèron lo segond temps per s’impausar: 30-22.
 
Al programa de la jornada d’entre las fèstas: Limós recebrà Tolosa a l’Agulha, dissabte; dimenge, se jogaràn Avinhon-Dragonets, Palau-Vilanuèva e lo dèrbi Carcassona-Lesinhan.
 
 
5 formacions d’Elèit 2 e 2 de Nacionala 1 en oiten de Copa
 
Se Baó èra ja qualificat pel tiratge al sòrt, lo primièr torn de la Copa vegèt las qualificacions de Lion malgrat la brava oposicion de Vilagalhenc-Argon (26-22), l’Escura (venceira a Sant Gaudenç: 34-14), Carpentràs (venceire de la Reula: 30-0), Vilafranca de Roergue (venceira a Tonens: 36-16). La suspresa venguèt de Sant Llorenç de Salanca (Nacionala 1) que sortís Montpelhièr 31-30. Dins la partida entre formacions de Nacionala 1, la còla de las Corbièras, Ferarls, se ganha la qualificacion a Tolon: 26-24.
 
Los oitens se debanaràn la dimenjada dels 23 e 24 de genièr.
 
 
Presents de Nadal
 
Podètz profeitar de Nadal per convidar los amics a la jornada Chivalièrs Catars-Dracs Catalans del dissabte 9 de genièr a Carcassona e per faire present d’un abonament al mesadièr XIII Magazine. La cronica occitana del numèro de decembre torna suls ligams bèls entre occitan e XIII:
 
“Contar lo XIII en òc. Los ligams entre lenga occitana e rugbi de XIII son d’una tala evidéncia que se concretizan sul plan literari:
 
— L’Afirolada, un raconte plan amusant (per l’ora agotat) de Ramon Gogaud e Alfred Raucolas, contava pel menut l’istòria d’una esquipa de barri qu’arribava pas de ganhar una sola partida!
 
— XIII coma rugbi pareguèt en 2000 a l’escasença de la Copa del Mond e recampava d’intervencions d’occitanistas afogats de XIII e de tretzistas que parlan la lenga. Se clava sus un vocabulari occitan de 700 tèrmes pertocant nòstre espòrt, tanplan sul terren coma en defòra!
 
— Lo mai recent, sortit en 2013, La partida clandestina, es un roman de Frederic Vouland (que joguèt al Pontet): d’un caire, conta las aventuras de dos joves jogaires, un provençal e un lesinhanés, que rejonhon l’aviacion anglesa e, d’autre caire, estúdia totes los benfaits del nombre 13. Lo Frederic nos ditz aver sul taulièr un roman novèl que l’eròi ne serà un tretzista.”
 
 
Ofèrta pels legeires del Jornalet valabla fins al... 13 de genièr de 2016 (mandadís franc de pòrt): XIII coma rugbi o La partida clandestina (bil.): 13 èuros per un. Ofèrta especial de Nadal: 20 èuros los dos. Comandar a: IEO-Aude, BP 51042, 11860 Carcassona Cedèx.
 
 
 
 
Alan Roch