Anonymous a reüssit a metre en mans de la justícia de Mexic un jovent de 17 ans que vexèt, umilièt e torturèt un òme sens domicili fixe a Tijuana (Mexic), mentre qu’un amic d’aquel nèrvi enregistrava l’accion. Lo jove menaçava lo paure amb çò que sembla una arma de ponh mentre que l’insultava, l’umiliava e lo torturava. Puèi publiquèt lo vidèo suls rets socials en provocant de fòrtas reaccions de refús. Sul pic reagiguèt lo collectiu Anonymous e comencèt una autra de sas accions reüssidas sus Internet. Los ciberactivistas lancèron diluns passat un messatge per mejan d’un vidèo publicat sus YouTube qu’avertissiá qu’avián localizat los agressors e que lor donavan dos jorns de relambi per demandar perdon a la victima e se liurar a la polícia, autrament avertissián aital: “farem que paguen per lor accion [...] e la dolor que causarem serà de mal garir”, çò menacèt Anonymous en remembrant que “lo racisme, l’umiliacion, la tortura, la discriminacion son de delictes que devon èsser punits”. L’endeman, lo jove sadic se presentava acompanhat de sa maire a la justícia a Tijuana. Las autoritats mexicanas an dobèrt una enquèsta per un delicte de lesions.
 
Lo gojat declarèt que se pentissiá de sas accions del temps que sa maire denoncièt que, tre lo messatge d’Anonymous, avián patit una avalanca de menaças e d’insultes a travèrs dels rets socials e pel telefòn mobil, que los ciberactivistas avián piratat.
 
Las accions de cruseltat e mesprètz contra de personas sens domicili fixe son pas excepcionalas en Mexic, segon çò que rapòrta El País. En mai d’aquò, lo comportament de l’adolescent garda de similituds amb las practicas del crime organizat d’aquel país. Los metòdes sadics e l’imatge de bandits poderoses que vivon al marge de la lei son enrasigats dins l’imaginari popular amb de nivèls de fascinacion e d’impunitat insuportables. Aquò se coneis coma lo fenomèn de la “narcocultura”.
 
Anonymous es un movement ciberactivista que se manifèsta sus Internet e que s’atribuís d’accions informaticas e informativas. Se presentan coma defensors de la libertat d’expression. Après qualques accions plan reüssidas, la cadena CNN los considèra coma un dels principals successors de Wikileaks.
 
Lo collectiu a quitament declarat la guèrra a l’Estat Islamic e a reüssit a neutralizar 5 500 comptes de Twitter de l’organizacion jihadista.