Dempuèi qualques jorns avèm vist per tot lo Mond de grops de musulmans qu’an protegit de crestians contra d’atacs jihadistas. Se passèt en Kenya fa pas gaire que los musulmans faguèron los escuts umans per protegir los crestians d’una fusilhada dins un autobús. Se passèt Lens, dins lo nòrd de França, que de musulmans i velhèron per los crestians que participavan de la messa de Nadal. E la meteissa causa se passèt a Besièrs. La nuèch de Nadal, de grops de musulmans velhèron a l’entorn de la Glèisa de la Devesa e de la Catedrala Sant Nasari per protegir lors conciutadans crestians contra d’eventuals atacs jihadistas.
 
Mas aquela iniciativa de convivéncia e fraternitat interreligiosa entre besierencs agradèt pas gaire al primièr cònsol de la vila, qu’a ja protagonizat qualques episòdis polemics de racisme. En mai de sos deliris islamofòbs, Robert Ménard a vist qu’una iniciativa ciutadana a mes en causa son projècte de crear una “gàrdia besierenca”. Dins un comunicat entitolat “«Gàrdia musulmana»: que fa l’Estat?”, publicat sus la pagina Facebook de la vila de Besièrs, Ménard brama contra çò qu’apèla de “patrolhas musulmanas” e las qualifica de “piromans” que “protegisson dels incendis”. En mai d’aquò, lo cònsol se planh que l’estat francés e lo prefècte ajan pas reagit coma o faguèron contra son anóncia de crear la “gàrdia besierenca”. Dins aquel sens ditz qu’el va sasir la prefectura sus aquò.
 
 

 
 
SOS Racisme fa sa denóncia
 
Los ciutadans musulmans de la ciutat de las nòu resclausas se son declarats “decebuts e tristes”, çò rapòrta Sud-Ouest. En mai d’aquò, Midi Libre apond qu’SOS Racisme farà sa denóncia a la justícia.
 
“Per Robert Ménard, tot gèst de fraternitat es una abominacion car ven afeblir son projècte prigondament racista”, çò ditz lo comunicat d’SOS Racisme, qu’espèra “que la justícia remembre lo drech, que proscriu aquelas paraulas d’òdi car remeton en causa los fondaments de l’espaci de la convivéncia”.