Eth Ostau Comengés qu’é ua associacion qu’a coma mission de cuélher e de transméter eth patrimòni culturau immateriau deths Pirenèus Centraus en tot hèr entretengs filmats au près deras gents qu’an eth occitan coma lenga mairala. En partenariat dab era Agéncia de Desvolopament dera Economia Culturala de Coserans e en collaboracion dab era Educacion Nacionala, Eth Ostau Comengés que veng de prodúser ua maleta pedagogica bilingüa occitan-francés aperada Conda’m Coserans [Conda’m eth Coserans]. Aquera maleta, basada sus ua seleccion de cuelhudas hètas en Coserans, que’s presenta coma un gatge pedagogic de transmission deth patrimòni culturau gascon. Que s’adreça naths ensenhaires deth primari, deth collègi e deth licèu e tanben naths animators qu’intervenguen sus eths temps d’activitats periscolaras.
 
Era maleta qu’a un doble DVD, on arretrobam tròces de cuelhudas, un ensemble de fichas que permeten d’aproprià’s eth contengut culturau e de proposar activitats pedagogicas. Que compreng tanben un CD-RÒM que propòsa un ensemble de documents complementaris (articles de revista, fotografias, transcripcion e traduccion deths testimoniatges) botat a disposicion deths ensenhaires —d’occitan mès tanben d’istòria-geografia— o intervenguents culturaus. Que i a tanben documents annèxes, un mòde d’emplec, un sommari, un indèx… Tres tèmas principaus que i son abordats. Eth prumèr que s’articula ath torn deths rites, deras credenças. Qu’òm i tròba anecdòtas sus eras practicas magicas, condes, istòrias sus Nadau… Eth segond tèma que pòrta sus era Segonda Guèrra Mondiala. Que s’i parla dera ocupacion alemanda, dera deportacion deths josieus, deths maquises, deths massacres, mès tanben dera liberacion e deras arrelacions entram eths abitants e eths alemands. Eth darrèr tèma qu’é consacrat ara vita coseranesa. Que i é question deths diferentis mestièrs que trobavan d’autis còps en Coserans: païsans, pastors, minaires, orsalhèrs, colportaires, glacejaires… Ath delà de simples testimoniatges istorics o etnografics, eths coseraneses que pòsan ua uelhicada sus eth mond que les a vistis a nèisher e qu’a talament cambiat e que partejan dab ua grana umilitat era sua filosofia de vita.
 
S’eth contengut d’aquera maleta é centrat sus Coserans, eths extrèts vidèo e eras pistas d’utilizacion que van mès luenh qu’eth sol territòri coseranés. Era maleta que permet atau ua dubertura de cap ara istòria dera Nauta Garona, de Catalonha, de França, d’Euròpa e tanben d’America! Que cau díguer tanben que, se totas eras vidèos son en occitan, que son sostitoladas en francés, nà perméter nà totis d’aver accès en aqueras informacions.
 
Aquera maleta, produita a 70 exemplars, qu’é concebuda nà èster prestada gratuitament naths ensenhaires e naths animators qu’intervenguen en mieilòc periscolar. Eth Ostau Comengés que pòt tanben proposar animacions ath torn deth patrimòni culturau immateriau deths Pirenèus gascons, en classa o pendent eths TPAS, en tot partir deth contengut dera maleta pedagogica o deths documentaris tematics sus era vita rurala (sus era cuelhuda dera èrba o deth blat, sus eths pastors, sus era fabricacion deth hormatge, sus era viticultura).
 
 
 
 
 
Joan Pau Ferrè e Alícia Traisnel
 
 
 

---

Mès d’informacions:
Sit web:  www.oralitatdegasconha.net
E-mail: ostau.comenges@o...
Telefòn: +33 (0)5 61 04 49 24