L’associacion de presonièrs d’ETA, Etxerat, a raportat que 28 presonièrs de l’organizacion comencèron divendres passat una cauma de la fam, en solidaritat amb lo presonièr etarra Iosu Uribetxebarria Bolinaga, malaut d’un càncer en fasa terminala. A l'ora d'ara son ja 82 los presonièrs que seguisson la cauma de la fam.

Uribetxebarria foguèt portat dimècres passat a l’espital de Sant Sebastian (Bascoat) pr’amor que s’agís d’un càncer terminal. Alavetz comencèt una cauma de la fam per demandar de passar los sieus darrièrs jorns a l’ostal, coma o prevei la lei.
 
Es per aquò que divendres comencèron tanplan una cauma de la fam un grop de 28 presonièrs de las presons de Villefranche-sur-Saône, Sevilha II e Castelló II. Los avocats d’Uribetxebarria Bolinaga an demandat la siá mesa en libertat.
 
Uribetxebarria foguèt condemnat per participar a la sequestracion del foncionari de preson José Ortega Lara. 

Arnaldo Otegi a dich per Twitter que s’apond a la cauma de la fam indefinida que fan aqueles presonièrs. Amb Otegi, son ja 82 los presonièrs caumaires. Al delà, fòra preson, 5 personas de mai seguisson tanplan la cauma.


Manifestacion a Sant Sebastian
 
Justament, dissabte passat, de milièrs de personas manifestèron per las carrièras de Sant Sebastian (Bascoat), en respondent a l’apèl del movement Herrira per exigir que se respècte los dreches dels presonièrs politics, mai que mai de Iosu Uribetxeberria e dels autres tretze presonièrs malauts. La protèsta demandava la libertat dels presonièrs malauts e que los presonièrs bascos foguèsson en de presons del Bascoat, en compliment de la lei.
 
En arribar a la plaça Okendo, Agustín Rodríguez, un dels 5 caumaires, expliquèt que la situacion d’Uribetxeberria es fòrça grèva e parlèt del besonh de metre fin a la dicha doctrina Parot, condemnada pel Tribunal dels Dreches Umans d’Estrasborg.