Quatre individús encagolats ensagèron de panar, diluns de ser, l’escotèr del cap de la polícia municipala de Marselha, Marc Labouz. Mas Labouz, dins sos 55 ans, umilièt los malfactors. O rapòrta La Provence.
 
Se passèt diluns de ser al quartièr de leis Olivas. “En rintrant dau trabalh, foguèri enquadrat per dos escotèrs, un de cada costat, amb dos individús quilhats dessús. Son fòrt ben organizats, n’i a un que vos geta rapidament au sòu e que vos dona de còps”, çò explicava Labouz sus RTL. Mas Labouz plaquèt sos agressors e se’n desbarrassèt. Lo resultat: tres agressors leugièrament ferits e un quatren que ne sortiguèt pus mal: “N’i a un que deu èstre bèu aqueste matin! Aquò deu pónher encara un pauc”, çò disiá un policièr al moment que se galejava al comissariat sus l’incident.
 
De son costat Labouz patís qualques contusions e una petita ferida a la cuèissa. El a fach sa carrièra policièra dins un còrs d’elèit, dins çò qu’èra lo GIPN e qu’ara es lo RAID, e es doncas ben entraïnat.