Las autoritats francesas an desclassificat aqueste diluns passat los archius policièrs e judiciaris del regim del Marescal Pétain. Lo dich “Estat Francés” amb capitala a Vichèi (Limanha Borbonesa) que durèt de 1940 a 1944 e que collaborèt amb l’ocupacion de l’Alemnaha nazi pendent la Segonda Guèrra Mondiala.
 
Aquela desclassificacion democratiza l’accès a aqueles documents e permet sustot de “multiplicar los estudis sul periòde que seguís la Segonda Guèrra Mondiala, pas simplament sus la guèrra”, çò diguèt a France Info l’istoriana Annette Wieviorka. Ela, qu’es especialista de la Segonda Guèrra Mondiala, apondèt al mèdia francés qu’“aquò permetrà de renovelar totes los estudis sus l’espurgament e sus la transicion entre lo periòde de l’Ocupacion alemanda e del regim de Vichèi [sic] e lo retorn a la Republica”.
 
Entretant, poirem veire las “penas d’indignitat nacionala”, prononciadas per cèrtas cambras civicas l’endeman de la guèrra e que poirián illustrar lo debat public sus l’actuala desescasença de nacionalitat prepausada per François Hollande.
 

 
 
A Vichèi n’an pro
 
De fach, a Vichèi n’an pro e òm cèrca de dissociar lo nom de la vila occitana del regim del Marescal Pétain que li es tròp sovent associat. Mai de seissanta ans après lo regim del dich “Estat Francés” del Marescal Pétain (1940-1944), divèrsas apelacions emplegan lo nom de la vila de la Limanha Borbonesa dins un sens negatiu. Es frequent d’entendre en francés lo nom de Vichèi (dison Vichy) coma sinonim de traïson, d’esperit de capitulacion e quitament de nazisme.
 
Dempuèi 2009, lo grop municipal de l’oposicion (PRG-PS-SE) ten un blòg que susvelha l’emplec marrit del tèrme “Vichèi”. “Vichèi, aquò es una vila, que ni apelèt, ni sostenguèt, ni mens ni mai que ges d’autra en França, lo govèrn d’eschasença que s’installèt dins sos murs en junh de 1940”, çò defendon.