A Balmar (Tolosan), l’Ostal dels Joves e de la Cultura (MJC segon sa sigla francesa) organiza regularament d’activitats en occitan per manténer la flama de la lenga dins la banlèga tolosana. Dissabte que ven, de 10h a 14h, l’escrivan Andrieu Bernat guidarà de discussions bilingüas, de lecturas e de convèrsas en escasença de la presentacion de son libre Auguste ancien prisonnier de guerre / Lo camin rascanhut de l’August. Puèi se debanarà un pica-nica de partejar en companhiá de l’autor.
 
Dins aquel nòu libre, Bernat prepausa als legeires de descobrir la vida vidanta d’un òme simple, son paire, dins lo mond païsan del sègle passat, perturbat per doas guèrras mondialas, sas cinc annadas de subrevida dins los camps de presonièrs en Alemanha del temps que la familha se refugièt en Avèna (Lodevés). L’obratge parla tanben de las dificultats e dels traumatismes qu’aqueles presonièrs, vencuts de 1940, visquèron après la guèrra al moment qu’August trabalha a la mina de la Rabassa e puèi dins las cavas de Ròcafòrt.
 
 
Per confirmar la participacion e per mai d’informacions podètz escriure a l’e-mail: pimparela@or...