Nascut en 1921 a Marselha, Andrieu Turcat es eissit d’una familha provençala d’industrials. Son diplòma de politecnician obtengut, En Turcat rejonguèt la Resisténcia a Londres puèi l’armada francesa que ne venguèt pilòt en 1947. Es atal qu’inicièt una carrièra aeronautica brilhanta que lo menèt fins a èsser pilòt d’ensag tant per d’avions militars coma lo Nord 1500 Griffon II (primièr avion de caça francés capable de volar a mai de mach 2) coma per d’avions civils. Foguèt el que pilotèt lo Concorde per son primièr vòl e per son primièr vòl supersonic. Batèt mai d’un recòrd del mond (velocitat en circuit barrat, velocitat ascensionala).
 
En parallèl e après l’aeronautica, Andrieu Turcat menèt tanben una carrièra politica coma cònsol adjonch a Tolosa. Foguèt deputat europèu del partit RPR. En 1983 farguèt l’Acadèmia de l’Aire e de l’Espaci que sa tòca es la promocion de l’aero- e astronautica dins los domenis scientifics, tecnics, culturals e morals. A l’edat de 69 ans obtenguèt son doctorat en letras d’istòria de l’art e venguèt professor liure d’aquela matèria.
 
Grand letrut, èra sòci de l’Acadèmia dels Jòcs Florals de Tolosa dempuèi 1975. Foguèt autor de plusors libres, essencialament sus l’aeronautica e sus l’istòria de l’art. Escriguèt tanben sas memòrias.
 
Andrieu Turcat parlava perfièchament l’occitan. Aguèt l’audàcia, a una epòca qu’èra pas aisit d’o gausar, de far una emission de television entièrament en occitan. Per sa carrièra excepcionala, son exemplaritat, sas proesas aeronauticas, son erudicion e sa moralitat, Andrieu Turcat es una personalitat d’excepcion del País Nòstre. Se poiriá parlar d’el coma d’un eròi dels tempses modèrnes.
 
 
 
 
TL