La vila de Pau aculhirà entre los 16 e 19 d’agost lo festenal Hestiv’Òc. La Musica, la dança, los espòrts, lo cinèma, lo teatre, las tradicions, los jòcs, la literatura, lo cant e las danças tradicionalas tornaràn èsser los protagonistas de la capitala bearnesa pendent quatre jorns. Aquel festenal es lo segond rendètz-vos cultural occitanista obligatòri de cada estiu, après l’Estivada de Rodés, e es organizat per l’associacion Accents del Sud amb lo sosten institucional de la region d’Aquitània e del departament dels Pirenèus Atlantics.

Ongan serà l’ochena edicion del festenal, nascut en 2005 a partir de l’iniciativa volontària d’Accents del Sud. Aquela organizacion culturala a un vintenat de personas benevòlas qu’arriban d’èsser 80 pendent los jorns del festenal. La division dels prètzfaches en còlas de trabalh es la clau del succès de l’associacion. Cal cercar l’origina del Hestiv’Òc pendent l’an 2003, quand dos sòcis fondadors verifiquèron lo succès del Festenal Interceltic de la vila bretona d’An Oriant. Dich e fach. Un an après creèron, amb mai de mond motivats, l’associacion Accents del Sud amb la tòca d’impulsar un festenal cultural, que vegèt lo jorn en 2005.
 
Malgrat que la majoritat de las activitats se debanaràn en salas, coma la Granda Scèna e lo teatre Sant Loís, qualques espectacles se faràn per las carrièras de Pau; per exemple lo teatre e las fanfarras. Cal soslinhar que fa dos ans que lo festenal decidiguèt de valorizar e difondre lo cinèma fach en Occitània, ja qu’es un dels aspèctes de la cultura occitana que mai a de besonh de difusion per se consolidar coma espaci normal de creacion.
 
Al delà, coma dins totas las edicions precedentas, i aurà un espaci consagrat a las autras culturas del sud d’Euròpa. Aital, la creacion e la musica bascas, aragonesas e catalanas auràn lo lor espaci pendent lo festenal. Cal remarcar ongan la participacion del grop valencian Obrint Pas, un dels grops musicals combatius de referéncia dels Païses Catalans.
 
Lo festenal se caracteriza tanben per una actitud responsabla e solidària. I a una atencion especiala per las personas amb de problèmas de mobilitat, en mai d’aquò, l’organizacion ensaja de far qu’una granda part del material emplegat siá reciclable e que los participants partegen las veituras per congestionar pas la vila. Coma totjorn, totes los espectacles son gratuits e destinats al public familial.
 
Podètz trobar tota l’informacion e lo programa del festenal aicí, sul sit web del Hestiv’Òc, e mai se, malaürosament, es solament en version francesa.