Belgica a anonciat la cession de catòrze ectaras de tèrra a Olanda. Se tracta de la zòna inabitada d’Eijsder Beemden, entre Visé e Maastricht, que recentament causa de chepics a la polícia dels dos païses.
 
Lo flume de Mòsa separa aquel tròç de Belgica de la rèsta de l’estat. Dins aquel endrech precís, lo flume es pas de bon navigar e la polícia bèlga i pòt arribar solament en batèl. Per contra, la polícia olandesa i pòt arribar per tèrra, mas a de besonh d’una permission internacionala per i intrar.
 
Fa gaire, i se son passats divèrses incidents, dont la descobèrta d’un cadavre decapitat. Aqueles faches an aumentat lo chepic que l’endrech venga un airal sens cap de contraròtle e, per tant, las autoritats dels dos païses an pensat qu’es “senat” de modificar la frontièra e qu’aquelas catòrze ectaras fagan partida dels Païses Basses, en prenent en compte qu’es un territòri inabitat.
 
En contrapartida, Olanda ofrirà a Belgica quatre ectaras de terren un pauc mai amont de Mòsa, segon çò que rapòrta Le Soir. Las frontièras deuràn èsser redessenhadas ongan, après l’aprobacion del tèxt pels parlaments dels Païses Basses e de Belgica.