Lo govèrn grèc es a alestir una proposicion que cèrca de satisfar las exigéncias de la Tròica, formada per la Banca Centrala Europèa (BCE), lo Fons Monetari Internacional (FMI) e la Comission Europèa (CE). E mai se lo contengut de la proposicion se coneis pas oficialament, qualques mèdias grècs an avançat qualques unes dels cambiaments principals. Sembla que l’executiu del primièr ministre Alexis Tsipras prepausarà de reduire las nòvas pensions d’un 35% a partir d’ongan. Las pensions actualas se respectarián, e mai s’en 2018 serián revisadas.
 
La reforma de las pensions èra una de las principalas exigéncias de la Tròica, mas segon lo jornal grèc Ekathimerini, Brussèlas demorariá pas satisfacha amb aquelas mesuras e demandariá una reduccion mai granda. Es previst que Tsipras presente la proposicion al Forum Economic Mondial de Davos, que se debanarà los 21 e 22 de genièr.
 
D’un autre costat, la proposicion compren tanben l’aument d’un ponch percentual de las cotizacions de la seguretat sociala per las entrepresas e de mièg ponch pels salariats. Aquò supausariá que mantas personas poirián pèrdre la pension minimala nacionala, qu’es de 384 èuros per mes. Se reduiriá tanben las pensions complementàrias que fòrça trabalhadors las pagavan per aver una retirada melhora.
 
Tot aquò deu servir per que Brussèlas apròve la primièra revision del tresen salvament acordat en agost passat , que compta 86 miliards d’èuros en tres ans.