Los membres del conselh permanent de l’Institut d’Estudis Araneses-Acadèmia Aranesa de la Lenga Occitana (IEA-AALO), dirigits per son president Jusèp Loís Sans, presentèron dijòus passat al sindic d’Aran Carlos Barrera las tres primièras publicacions, dos ans après la creacion de l’organisme, segon çò que rapòrta lo Conselh General d’Aran.
 
Lo sindic d’Aran Carlos Barrera aculhiguèt aquelas òbras amb “plaser”, pr’amor que “son elements de coesion dera nòsta lengua entà mantier normalizat er aranés-occitan estandard e eth sòn emplec sociau”. De son costat, Sans manifestèt que los membres de l’IEA-AALO se sentisson “eretièrs dirèctes d’ua lengua millenària, era lengua mès prestigiosa dera istòria dera literatura, qu’ei era mès fidèla e pròcha dera emplegada pes trobadors”.
 
Las tres òbras presentadas son: Gramatica basica der occitan aranés; Per escriure l’occitan; e Discorsi de presentacion der Insitut d’Estudis Aranesi-Acadèmia Aranesa dera Lengua Occitana. Son tres òbras que se presentaràn e distribuiràn dins totas las escòlas de la Val d’Aran a la dispocicion dels escolans, liceans e professors. Se presentarà tanben los obratges a totes los conselhs municipals d’Aran, a l’Institut d’Estudis Catalans, a l’Institut d’Estudis Ilerdencs e a la Conselhariá de la Cultura de la Generalitat de Catalonha.
 
Sans anoncièt tanplan que seguirà un vocabulari basic de l’occitan aranés, un estudi de sintaxi e una gramatica basica de l’occitan estandard.

 
— La Gramatica basica der occitan aranés es un tèxt provisòri. Segon Sans, la lenga “ei deth pòble e non serà enquia laguens d’un o dus ans quan se harà era publicacion definitiva, donques qu’açò depenerà der emplec sociau que se’n hèsque”. Per ara an publicat 2500 exemplars.
 
— Per escriure l’occitan es una òbra de Jacme Taupiac sus l’occitan estandard que se poirà utilizar dins l’educacion segondària en Aran. N’an publicat 1000 exemplars.
 
— Discorsi de presentacion der Insitut d’Estudis Aranesi-Acadèmia Aranesa dera Lengua Occitana amassa los discorses de presentacion dels membres de l’organisme e ne definís lor filosofia de trabalh. An publicat 1000 exemplars d’aquel libre.