Lo Departament de la Justícia dels Estats Units d’America a anonciat divendres passat qu’imputarà pas cap de delicte a Goldman Sachs ni a cap dels sieus executius. Lo Senat emetèt un rapòrt arunan amb de denóncias de practicas indegudas, coma l’engana sus las subprimes, e lo remetèt a la justícia, que comencèt una enquèsta per fraudariá financièra. Pasmens, l’enquèsta s’es clavada sens cap d’acusat: “i a pas cap de basa viabla per entreprene un procès penal”, çò diguèt lo Departament de la Justícia.
 
En julhet de 2010, Goldman Sachs paguèt 550 milions de dolars per metre fin a una accion en justícia de la Comission del Mercat de las Valors, que l’acusava d’enganar los clients. La banca sonque admetèt d’errors per aver donat d’“informacions incompletas”, malgrat qu’a totjorn refutat d’aver agit contra l’interès dels clients.
 
Goldman Sachs recebèt en 2008 l’autorizacion per passar de banca d’investiments a banca comerciala. Ara s’es desliurada de las acusacions seguentas: la d’èsser un dels actors ocasionant la bofiga immobilièra de l’an 2007 als Estats Units; e la d’aver ocultat lo deficit del deute grèc pendent l’epòca que Mario Draghi, actual president de la BCE, èra vicepresident de Goldman Sachs per Euròpa.