L’HDP e lo DBP responsabilizan las autoritats turcas de la mòrt de las activistas Seve Demir, Fatma Uyar a Pakize Nayir. “I a pas res de l’azard qu’ajan causidas tres femnas”, çò ditz la copresidenta de l’HDP. Es lo tresen anniversari dels assassinats de París.

“Lo fach qu’ajan causidas tres femnas a l’avantgàrdia de la resisténcia non es pas una coïncidéncia. An fixat coma objectiu la lucha per la liberacion de totas las femnas”. Son las paraulas de la copresidenta del partit pròcurd HDP, Figen Yuksekdag, après l’assassinat de las politicianas e activistas curdas Seve Demir, Fatma Uyar e Pakize Nayir lo 4 de genièr passat a Silopi, en Curdistan del Nòrd (Turquia). Las tres mòrts —al mièg d’una espirala de violéncia que ja dura despuèi de meses— an luòc qualques jorns abans que se commemòre lo tresen anniversari de l’assassinat de las activistas curdas Sakine Cansiz, Fidan Dogan e Leyla Söylemez a París.

Silopi, ont es en vigor un cobrifuòc despuèi lo 14 de decembre, es una de las scènas del conflicte entre las fòrças turcas, d’un costat, e lo PKK e las guerrilhas urbanas que lo sostenon, de l’autre, que despuèi julhet de 2015 an fach almens de centenats de mòrts.

De fonts de l’HDP e del tanben pròcurd Partit Democratic de las Regions (DBP) responsabilizan las autoritats turcas de l’assassinat de las tres femnas e d’un òme non identificat. La deputada de l’HDP, Aycan Irmez, a denonciat que ni lo servici d’urgéncias, ni las autoritats sanitàrias volguèron pas mandar d’ambulàncias per aver suènh de las victimas.

Irmez a associat las mòrts de las tres activistas amb las de París d’ara fa tres ans: “Los criminals son los meteisses. Totun, se se pensan que nos pòdon eliminar en executant nòstras femnas e nòstres mainatges, s’enganan. Seguirem lors passes e menarem a tèrme la lucha fins que lors sòmis d’un país liure se fagan realitat”.

L’HDP se situa a l’esquèrra de l’escaquièr politic de Turquia. Reclama una solucion democratica pel conflicte turcocurd e l’autonomia de las províncias curdas. Lo partit ten lo feminisme, l’ecologisme e lo respècte de la diversitat coma pilars fondamentals.


París: las enquèstas amiran los servicis secrets turcs

Lo cas dels assassinats de Cansiz, Dogan e Söylemez aqueriguèron de notorietat mondiala, entretant perque aguèron luòc al bèl mièg de la capitala francesa. Las autoritats turcas amirèron sul pic la tèsi d’un conflicte intèrne del PKK —que Cansiz n’èra una de las fondadoiras— coma explica de las mòrts. Totun, las recèrcas posterioras de l’agéncia alemanda d’intelligéncia e dels enquestaires franceses amiran l’implicacion dels servicis secrets turcs dins aquela accion.
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion
 
 
 
 
 
 
 
 
 

---