La tòca de la recèrca èra de conéisser los mecanismes cerebrals de las personas elevadas dins un encastre bilingüe e de ne trobar los lors avantatges cognitius. L’estudi se menèt a tèrme dins l’Universitat Pompeu Fabra de Barcelona (Païses Catalans), segon d’informacions del jornal La Vanguardia.

 

S’es demostrat que los enfants bilingües an una màger capacitat per identificar l’informacion considerabla e ne refusar la partida qu’es insignificanta; per contra an un vocabulari mens vast que los monolingües per s’exprimir dins las doas lengas. Al delà, d’estudis demòstran qu’a causa de la constanta gimnastica mentala, los enfants expausats a doas lengas manifestaràn fòrça mai tard que los monolingües de malautiás mentalas coma l’Alzheimer.

 

L’ipotèsi que manteniá la còla de l’Universitat Pompeu Fabra, menada per Nuria Sebastián, defendiá que los mainatjons desvolopan sul pic de capacitats per diferenciar las doas lengas mairalas e identificar las proprietats de caduna, çò que seriá ligat al lor desvolopament cognitiu.

 

L’estudi se menèt a tèrme amb 48 enfants que la mitat èran bilingües en espanhòl e catalan e que l’autra mitat parlavan sonque espanhòl o sonque catalan. S’agissiá d’una vidèo sens son ont se podiá veire tres femnas que parlavan de còps en francés e de còps en anglés. Mejançant un metòde sofisticat de mesura de las responsas, s’analisèt las reaccions dels mainatjons davant las diferentas lengas e se corroborèt l’ipotèsi: los mainatjons bilingües podián diferenciar los cambiaments de lenga sonque en agachant los pòts de las femnas. Per contra, cap dels mainatjons monolingües foguèt capable d’o far.

 

Aquelas descobèrtas suggerisson que las personas bilingüas desvolopan un gaubi màger per identificar los aspèctes distintius de las doas lengas, e mai se las coneisson pas. 

 

Segon l’estudi, alavetz, l’èsser qu’a lo cervèl expausat a doas lengas a la capacitat  d’aquerir l’agilitat mentala que li permet de se concentrar mai, en tot evitar las distraccions.