Dissabte, foguèt XIII de l’alba fins al còr de la nuèit a Carcassona amb mantes rendètz-vos esportius e festius entre audencs e catalans.

La fòrça catalana
 
Aquò comencèt de matin sus la pelena de l’estadi Benausse. La seleccion dels minims audencs ganhèt fàcia als joves catalans: 38-16. En cabdèths, los catalans s’impausèron dins lo segond temps: 30-16.
 
Del temps de miègjorn, al gimnasi del Viguièr, en XIII cadieral, los Dracs ganhèron contra Biàrritz-Bascoat: 77-33.
 
De vèspre, mai de 6 000 personas se ramosèron a l’Estadi Domèc per seguir l’afrontament entre los U19 catalans que se preparan a rintrar oficialament dins lo campionat anglés e la seleccion audenca dels U20. Los catalans faguèron aisidament la diferéncia: 68-12.
 
 
Los Dracs ja en cambas
 
Un còp escotat Els Segadors e lo Se Canta, se passèt a la partida entre los Dracs e los Chivalièrs Catars. Los Dracs presentavan quatre nòuvenguts: los alièrs Pat Richards e Jodie Broughton, lo mesclanha Richie Myler e lo segonda linha Justin Horo.
 
Al cap de 4 minutas, Richie Myler anava entre los pals e Pat Richards transformava. Los Chivalièrs se mostravan plan valents, mas la palma demorava dins las mans catalanas. Aquela possession se concretizèt per tres autres ensages abans la pausa marcats pel capitani Jason Baitieri, per Tòni Gigòt (plaçat a l’arrièr) e per Jodie Broughton, los tres transformats per Richards: 24-0.
 
Los Chivalièrs Catars tornèron plan determinats mas la maquina catalana èra tròp fòrta e tornèt passar quatre còps: Jodie Broughton un còp de mai, lo jove talonaire Alrix Da Costa per sa primièra aparicion en primièra, puèi Vincenç Duport marcava dos ensages aprèp sa sason blanca deguda a una nafradura. Inu ensaquèt tres transformacions. Los Chivalièrs capitèron pas a marcar: se’n calguèt de gaire sus un còp de pè a seguir, mas l’arbitre anglés refusèt la realizacion. Planchòt final logic: 46-0. Tomàs Bòsc (isquiocambièrs) e Antòni Maria (nas) pòrtan las marcas de la partida.
 
Los Dracs anaràn jogar una segonda partida amicala a Huddersfield lo 23 de genièr.
 
Los Chivalièrs daissèron pas jamai tombar, mas, amb quatre entraïnaments collectius, èra pas pro per contrastar los catalans. La question pausada als dirigents de Carcassona, Lesinhan e Limós es de saupre cossí contunhar l’aventura per montar una estructura professionala audenca.
 
Jol tibanèl de Domèc puèi dins la sala del Dòma, se parlèt encara XIII plan de temps e se tornèt véser d’imatges de las grandas finalas entre formacions audencas e catalanas.
 
 
Albi e Avinhon se plaçan pel grop 2
 
En campionat, las doas partidas avián una influéncia sul classament e en particular sus la participacion al grop 2 (esquipas entre 4a e 6a plaça) per la segonda fasa. Albi pren una opcion en ganhant contra Palau 28-16 e Avinhon capita a véncer a Vilanuèva: 22-20.
 
Dissabte, Albi recebrà Tolosa-Broncos. Dimenge, Carcassona recebrà Vilanuèva; partida sarrada en tèrra catalana entre Palau e Avinhon. Lesinhan que jòga pas seguirà de prèp lo rescontre entre Limós e Sant Estève-XIII Catalan a l’Agulha —vist que las tres formacions son en batèsta per doas plaças dins lo grop bèl de la segonda fasa—.
 
 
 
 
Alan Roch

---