A son entrada, lo conselh departamental d’Aude ven d’installar en aquesta fin de 2015 una Carrièra de las Plantas que presenta los divèrses tipes de pèira que son expleitats dins lo departament. Las pèiras s’acompanhan de las plantacions de plantas grassas e de panèls d’explica que l’institucion n’a demandat la revirada en occitan a la seccion audenca de l’Institut d’Estudis Occitans.
 
En vos passejant dins aqueste òrt, ne saupretz aital mai sus: las carrièras de marme de Caunas, mas tanben de Montjòi o la Pauma; l’expleita del gres gris a Mossolens; lo betum de la cimentariá Lafarge a la Novèla; la dolomia negra de las Tors; la vena de qüartz de Saissac; los calcaris blancs de Carlipan; las minièras feldspaticas de Salvesinas; la pèira de Lenhas de Fabresan per la fabricacion de lindals e d’enquadraments de doberturas, las chiminièras e las fonts, lo mobilièr urban…; lo gneis dels Martins, en Montanha Negra; l’engrunat de Sant Paulet; l’argela de Sant Pàpol; l’arena silicocalcària de color clara de la sablièra de Bram; los greses calcaris serviguèron per l’edificacion de Ciutat, de las catedralas Sant Nasari e Sant Miquèl, de Sant Vincenç; lo jaç de ròcas calcàrias de color jaunassa de la Carrièra de Ròcatalhada s’expleita a cèl dobèrt...
 
Es atal tota una activitat qu’es mesa al jorn jols angles istorics, economics mas tanben ecologics e... lingüistics. Las fòtos se pòdon descargar e, se las volètz mai grandas, sufís d’o demandar!
 
 
 
 
Alan Roch