Almens sièis personas moriguèron dijòus passat après una seguida d’explosions e fusilhadas al centre de Jakarta. L’Estat Islamic a revendicat los atacs a travèrs d’una agéncia d’informacions. Segon la cadena de television Metro TV, la polícia pensa qu’aquel l’atac, l’aurián organizat mai d’un desenat d’assalhidors (que serián entre dètz e catòrze).
 
Las victimas comprendrián cinc dels quites atacants, dont almens dos èran de suicidaris. Aquestes darrièrs faguèron detonar los explosius que portavan dins un quartièr del centre de la capitala indonesiana ont s’aculhís los burèus de divèrsas agéncias e ambaissadas de l’ÒNU. Après las explosions, se debanèt una fusilhada entre los atacants e la polícia dins un teatre plaçat dins lo meteis edifici qu’un cafè de la cadena estatsunidenca Starbucks.
 
Un pòrtavotz de la polícia indonesiana confirmèt qu’almens tres policièrs e tres civils moriguèron.
 

 
 
 
 
 
 

---