L’abitarèla del monastèri de Poblet (Catalonha) a aculhit fins a dimenge un grop de trabalh de dètz e uèch personas que preparan un projècte de constitucion catalana. Lor objectiu es de lo liurar al Parlament de Catalonha a la fin del mes d’abril e que servisca de ponch de partença a la comission legislativa, l’organ que s’encargarà d’elaborar la constitucion amb de membres de la societat civila. Lo grop non solament es format per d’avocats e de gents liadas al mond judiciari, mas tanben i participan de jornalistas, d’engenhaires, d’economistas e d’entrepreneires entretant. Eles son Agusti Carles, Jordi Domingo, Josep Faiges, Beth Ferran, Toni Fitó, Joan Fonollosa, Francesc X. Jaurena, Montserrat Llobet, Sergi Miquel, Eduard Peris, Pep Puig, Sebastià Sardiné, Carles Solà, Santi Vilanova e Eduard Vinyamata. De son caire l’èx-jutge Santi Vidal, que tanben fa partida del grop de trabalh, a pas pogut participar al rescontre a causa de son implicacion politica dempuèi qu’es elegit senator a las eleccions espanhòlas del 20 de decembre passat.
 
Aquel grop de trabalh se basa sus tres esbòsses prèvis per elaborar lo tèxt definitiu que serà liurat al Parlament. D’un caire i a lo projècte Una Nòva Constiticion (unanovaconstitucio.cat), menat per Santi Vidal, de l’autre i a los projèctes Constitucio.cat e Engenhaires per l’Independéncia (Enginyers per la independència), coordenats per Joan Fonollosa. Los tres esbòsses foguèron presentats al començament de l’an 2015. A partir d’alavetz, las tres còlas decidiguèron de se coordenar per trabalhar subre un tèxt unic.
 
Dempuèi divendres son estats a ordenar tota l’òbra facha fins ara, que dedins an tengut en compte los mai de tres mila comentaris que las gents an faches subre las tres constitucions prèvias; i an identificat los ponches mai conflictius e an fixat la data per liurar lo tèxt al Parlament. De fonts del jornal catalan Vilaweb asseguran qu’assajaràn d’aver lo tèxt de prèst per Sant Jòrdi, la fèsta nacionala catalana, lo 23 d’abril que ven.

---