Dos ans puèi, la Comission Europèa a mes França tornarmai jos susvelhança a causa del desmantelament de divèrses camps de gitanos aquestes darrièrs jorns.

La Comission Europèa seguís de près de la manièra que las autoritats francesas procedisson al desmantelament dels campaments de ròms e se vòl assegurar del respècte de las garentidas contra los percaces arbitraris e los tractaments discriminatòris, çò declarèt a l’AFP un pòrtavotz de la Comission.
 
“Los servicis de la vicepresidenta en carga de la Justícia, Viviane Reding, son en contacte amb las autoritats francesas e analisan la situacion per s’assegurar que las nòrmas europèas son respectadas”, çò diguèt Minar Andreeva.
 
Viviane Reding s’indignèt fa dos ans, e s’afrontèt a Sakorzy, per la manièra que lo sieu govèrn expulsava los gitanos, qu’èran dins la lor granda majoritat originaris de Romania e Bulgaria e qu’èran donc de ciutadans de l’UE.
 
Jos la menaça d’una procedura per discriminacion, París acceptèt fin finala de modificar la lei estatala per prene en compte las nòrmas europèas tocant las repatriacions de ciutadans de l’UE.
 
La legislacion francesa a integrat totas “las garentidas que protegisson los ciutadans de l’Union contra los percaces arbitraris e los tractaments discriminatòris”, çò diguèt Reding, plan contenta, en agost de 2011.
 
Mas un an puèi, encara pendent l’estiu, lo nòu ministre de l’Interior, lo socialista Manuel Valls, a donat mission als prefèctes de desmantelar los campaments gitanos “quand i a agut decision de justícia” e los vòl repatriar.