Mentre que nos disián que cal far d’economias a causa d’una crisi economica, las inegalitats entre rics e paures dins lo Mond entièr son de mai en mai grandas, e s’accelèran. Es aquò que denóncia lo darrièr rapòrt d’Oxfam publicat diluns passat. Segon l’organizacion umanitària, las 62 personas mai ricas de la planeta an tant de riquesa coma la mitat de la populacion del Mond que son los mai paures, çò es aperaquí 3,6 miliards de personas.
 
Lo rapòrt mòstra de donadas esglasiantas e insportablas. Per exemple l’1% de la populacion del Mond a mai de riquesa que tot lo 99% restant. Segon l’organizacion, aquela enòrma inegalitat es possibla a causa dels paradises fiscals qu’aurián, segon lo rapòrt, 7,6 bilions d’èuros amagats.
 
Lo rapòrt avertís que l’inegalitat economica afeblís la creissença e la coesion sociala e que son los mai desfavorizats que mai ne patisson las consequéncias.
 
L’organizacion remarca que “l’inegalitat es lo resultat de decisions politicas deliberadas” e fa una crida mondiala a refusar “un modèl economic que solament fonciona per una minoritat”. Dins aquel sens, Oxfam prepausa una seguida de suggesions als govèrns e a las entrepresas del Mond, coma: desvolopar l’egalitat economica, modificar lo sistèma mondial de recèrca, fixar los prèses dels medicaments per que sián a posita de totes, etc.
 
 

 
 
 
 
 

---