Dètz ans après sa mòrt, los enquestaires del presumit assassinat de l’èx-membre del KGB Aleksandr Litvinenko an publicat los resultats definitius. Lor recèrca confirma çò que mantes ja pensavan: Litvinenko moriguèt après ingerir de polòni 210. Çò mai determinant es que los servicis de l’intelligéncia britanica an pogut demostrar que foguèron los èx-companhs e camaradas de Litvinenko, Andrei Lugovoi e Dmitriy Kovtun, qu’aurián introduch la substància letala dins lo tè que prenguèt Litvinenko pendent un rescontre cordial dels tres al centre de Londres. 22 jorns puèi, Litvinenko morissiá dins la capitala britanica environat per la polemica.
 
“Soi convencut que Sénher Lugovoi e Sénher Kovtun metèron de polòni 210 dins la teièra del Pine Bar, lo 1r de novembre de 2006”, çò afirma lo jutge Sir Robert Owens dins lo rapòrt de l’enquèsta. Owen considèra “probable” qu’Andrei Lugovoi, qu’es a l’ora d’ara membre del Parlament rus, empoisonèsse Litvinenko per òrdre del Servici Federal de Seguretat Russa e que Dmitriy Kovtun “agiguèsse tanben jos sos òrdres”.
 
“Me satisfà fòrça que los mots que lo mieu marit prononcièt dins son lièch de mòrt, en acusant Putin [de son assassinat], sián estats provats per un tribunal britanic”, çò a dich la veusa d’Aleksandr Litvinenko, Marina, a las pòrtas de la Cort Suprèma. Marina Litvinenko a exigit que lo Reialme Unit agisca contra totas las formas de terrorisme, compresas las perpetradas per los quites estats, e a demandat que s’impause de sancions contra lo regim de Putin. “Exigissi l’imposicion de sancions economicas e que s’enebisca de viatjar als acusats, comprés Putin”, çò a demandat Marina Litvinenko, en apondent que veniá de recebre una letra qu’insinuava que lo primièr ministre britanic, David Cameron, “fariá pas res davant las descobèrtas devastairas” del jutge Owens.
 
La conclusion de l’enquèsta sus la mòrt de Litvinenko arriba en un moment que lo Departament dels Afars Exteriors del govèrn britanic prepausava d’adocir las sancions economicas que los Estats Units e l’Union Europèa impausèron al Cremlin e a qualques entrepresas après que  Russia s’annexèsse Crimèa en 2014. Segon de fonts del Partit Conservator, lo quite ministre dels afars europèus del govèrn britanic, David Lidington, auriá demandat a Cameron d’intensificar pas las sancions contra Russia, pr’amor qu’un cèrt melhorament de las relacions entre Londres e Moscòu ajudariá a arribar a un acòrdi per metre a fin a la guèrra de Siria.
 
De son costat, lo cap dels liberaldemocratas, Tim Farron, a mostrat publicament son sosten a las demandas de Marina Litvinenko. “Un ciutadan del Reialme Unit foguèt assassinat per carrièras dins Londres amb de polòni; foguèt un atac al còr d’Anglatèrra contra las nòstras valors e la nòstra societat”, çò a declarat.
 
 
Russia acusa Londres de violar la presompcion d’innocéncia
 
“Moscòu acceptarà pas lo verdicte de la justícia britanica tocant l’enquèsta de l’afar Litvinenko, Londres a violat lo principi de presompcion d’innocéncia”, çò an declarat de fonts del Cremlin a l’agéncia russa d’informacions RIA. Aquela font considèra tanplan qu’es “illegitim” que cèrtas partidas de l’enquèsta se sián tengudas en secret e pronostica “de seriosas consequéncias” en çò que tanh a las relacions entre Londres e Moscòu.
 
De son costat, Lugovoi a dich que las acusacions contra el son “absurdas”. “Los resultats publicats meton en evidéncia uèi, encara un còp, la posicion antirussa de Londres: es l’estrechesa d’esperit e la manca de volontat de part dels britanics per trobar una causa reala qu’explique la mòrt de Litvinenko”.
 
Un dels òmes fòrts del govèrn de Putin, Viktor Ivanov, poiriá aver jogat un ròtle clau en l’assassinat de Litvinenko. Aquel èx-oficial del KGB e actual cap de la division federala d’estupefasents a qualificat l’enquèsta de “farsa” e los resultats de “teatre de l’absurde”.

---