Marty Hell foguèt fondador e inlassable militant d’un partit autonomista nomenat Union del Pòble Alsacian qu’es vengut ara, aprèp fusion amb una autra organizacion, Unser Land (País Nòstre). Foguèt un òme que consagrèt sa vida tota al servici de la liberacion de son país. Alavetz, escriguèt un obratge de pedagogia politica e de combat.
 
Per çò que se tracta ben d’aquò. Per pròva, avèm pas que de mençonar lo títol e lo sostítol del libre, Lo drama d’una colonizacion: las vertats istoricas, las enganas metodicas. D’efièch, tota la primièra part de l’obratge es consagrada per l’autor a restablir cèrtas vertats istoricas que lo poder jacobin s’afana a desguisar. Marty Hell i cita sovent d’autors alsacians, contaporanèus o d’a passat temps. D’autors plan pauc coneguts, e mai dels quites alsacians. Per exemple aquel André Ulrich que, cercant de comprene la politica liberticida del jacobinisme, escriguèt: “L’uniformitat lingüistica es un principi tan bistorlòri coma lo de l’uniformitat religiosa”.
 
La francofolia es venguda religion d’estat amb la Revolucion Francesa. Lo 9 de decembre de 1793, la sesilha del Club dels Jacobins d’Estrasborg foguèt esborassada e cridassièra. Los jacobins importats de França, menats per un cèrt François Monet, prepausèron, ni mai, ni mens, que de “deportar totes los alsacians de cap al centre de França e de los remplaçar per de bloses sangs franceses, per qu’aquesta Alsàcia, encara plan tròp alemanda, veng[uèsse] d’un còp francesa”. Remarcatz que se la deportacion se faguèt pas en 1793, probablament per manca de mejans, foguèt pas que partida remesa. D’efièch la deportacion de massa, l’epuracion etnica programada, se debanèron de 1918 fins a 1920. En dos ans, 111 915 òmes, femnas e enfants foguèron expulsats manu militari de lor país per deportats per un grand nombre en Africa del Nòrd. Plan solide, tot aquò en represalhas per “collaboracion amb l’enemic”. E Marty Hell fa remarcar qu’en 1870, quand los alemands liberèron los alsacians del jo francés, deportèron pas degun e quitament pas los agents de las administracions, pr’aquò francesas. De foncionaris que tanplan se serián poguts veire acusats de collaboracion amb França.
 
Mas l’idèa fondamentala veïculada per l’autor, pel movement autonomista alsacian, mas tanben per de geopoliticians senats, es la de sobeiranetat e de neutralitat per Alsàcia-Lorena. Aquel país, pr’aquò alemand, es un país de termièras. Dempuèi 1648 passa alternativament jos la dominacion d’Alemanha o de França. Se cal pas far d’illusion malgrat las falsificacions istoricas d’istorians jacobins: tre 1870 França arrestèt pas d’aver dins l’ase de recuperar Alsàcia-Lorena. Las tensions del començamentdel sègle XX podián pas far mai que de desbocar sul chaple que sabèm.
 
Tre la recolonizacion d’Alsàcia-Lorena per França e per se desliurar de l’escanament economic estipulat pel Tractat de Versalhas, los alemands coneguèron pas la calma abans de s’èsser tornats armar e de prene lor revenge. Atal venguèt la Segonda Guèrra Mondiala.
 
E mai per o virar dins totes los sens, las doas guèrras mondialas trapan lors originas dins la volontat imperialista del jacobinisme. Aquò se seriá pogut evitar almens qu’Alsàcia-Lorena foguèsse estada erigida en estat independent e nèutre. Es l’idèa simpla de l’estat-tampon que faguèt sas pròvas. Mas, un còp de mai, opcion inacceptabla pel poder francés e son ideologia intransigenta. Pr’aquò la neutralitat d’Alsàcia-Lorena èra, e demòra, la solucion per dire d’arrestar definitivament la “grandor de França”. E Marty Hell cita lo Comte de Gasparin qu’escriviá dins un libre paregut en 1870: “Balhatz-vos una Alsàcia nèutra en luòc d’una Alsàcia conquistada. Aquí son las garentidas de patz que porgiràn l’amaisament”. Aquel òme sap plan que la guèrra de 1870 se seriá poguda estalviar almens se los tractats de 1815 aguèsson pas tornat Alsàcia-Lorena dins las patas de França. Contunha en escrivent: “Aprèp la Belgica nèutra ven lo Luxemborg nèutre; puèi cal sautar per dessús Lorena-Alsàcia per aténher la Soïssa nèutra. Sèm obligats de traversar Alsàcia quand òm se vòl passar la fantasiá de se batre entre franceses e alemands. En completant la zòna neutralizada, la refortissèm dins una mesura afirmada. Tant que se daissarà dobèrta la pòrta d’Alsàcia, la neutralitat de Belgica, de Luxemborg e de Soïssa revestirà pas pro lo caractèr d’una institucion europèa. La neutralitat dels tres païses acquerirà una valor fondamentala lo jorn que lo quatren país lor serà adjonch”.
 
A prepaus de la politica d’eradicacion de las lengas pels govèrns franceses, Marty Hell torna subre las famosas Assisas de las Lengas Regionalas que se tenguèron a París lo 4 d’octòbre de 2003. Aviá a aquel moment prepausat als occitanistas d’anar a París pas que per destorbar l’acamp en bofant a plen de gargalhòl dins de fiulets ensordants. Aquò, fins que l’administracion foguèsse obligada de clavar la sesilha agantacolhons.
 
Amb amarum, dins son libre, Marty Hell conta cossí se faguèt enganar amb los autres: “Òm s’esperava al minim, aguèrem drech a mens que lo minim, valent a dire a pas res. Los pus avisats s’i esperavan, los mens aluserpits arrestèron d’aplaudir als efièches oratòris dels divèrses intervenents que, qu’òm o vòlga o pas, s’èron faches rotlar dins la farina d’un biais magistral”.
 
Lo libre de Marty Hell es un libre escrich per un militant a l’atencion de totes los publics. Los nacionalistas occitans i faràn coneissença amb la situacion particulara d’opression que preval ara per ara en Alsàcia. Cal notar qu’amb l’ostal d’edicion Jérôme Do Bentzinger, los autonomistas alsacians se son esquipats d’una aisina de comunicacion fondamentala.
 
 
 
 
Sèrgi Viaule
 
 
 

---

HELL, Marty, 2005, Le drame d’une colonisation: les vérités historiques, les tromperies méthodiques, Jérôme Do Bentzinger, 195 paginas.

---