“Desvelha-te Itàlia, es ora d’èsser de civils”. Amb aquel eslogan, de milierats de personas manifestèron dissabte passat dins ochanta doas vilas de l’estat italian per sosténer la primièra lei  de l’istòria d’Itàlia que prevei de legalizar lo maridatge dels parelhs omosexuals. La proposicion a levat una fòrta polemica e començarà de s’estudiar dins lo Senat dijòus que ven.
 
Aquel projècte de lei l’a promogut lo Partit Democrata e es una de las prioritats del primièr ministre Mateo Renzi per aqueste an de 2016. Fins ara, la proposicion de lei es estada blocada pendent qualques meses per la comission de justícia del Senat italian.
 
Las divisions qu’aquel afar las a provocadas dins las diferentas fòrças politicas fa preveire que lo debat serà plen de tensions. De fach, Renzi a trobat una fòrta oposicion tant dins los partits d’opisicion coma dins son pròpri govèrn de coalicion. La glèisa catolica e lo quite papa Francés se son mostrats partisans d’arrestar lo projècte.
 
 
De manifestacions reaccionàrias
 
De manifestacions d’oposicion se debanèron dins un cinquantenat de vilas, en seguissent la crida dels las dichas Sentinèlas Drechas (Sentinelle in Piedi), un movement qu’a fòrça parallelismes ideologics e estetics al movement francés de la Manifestacion per Totes (la Manif pour Tous). Defendon lo modèl tradicional de familha, refusan que las personas del meteis sèxe qu’ò vòlgan se pòscan maridar entre elas e qu’adòpten d’enfants. An protestat, coma o fan de costuma, quilhats en silenci e en legissent un libre.

---