Un candidat de centredrecha, Marcelo Rebelo de Sousa, obtenguèt dimenge una victòria brilhanta a las eleccions presidencialas de Portugal. S’engatgèt sul pic a emplegar son poder d’influéncia amb lo govèrn socialista per evitar que se degalhèsse mai l’economia del país.
 
De Sousa recebèt lo 52% dels vòtes al primièr torn, çò que rend inutil lo segond. Son opausant mai sarrat obtenguèt mens de la mitat dels vòtes e la participacion foguèt del 52%.
 
Lo president de Portugal a pas de poder executiu e exercís solament, essencialament, un ròtle simbolic. Totun, qualques còps pòt aver d’influéncia sul govèrn e pòt dissòlver lo Parlament en cas de crisi politica.
 
Lo govèrn socialista minoritari —format fa pas gaire— govèrna Portugal amb lo sosten del Partit Comunista e del Blòc d’Esquèrra. Lo nòu executiu ensaja d’arrestar la politica d’austeritat impausada per l'Union Europèa, tan criticada intèrnament. Mas Rebelo de Sousa anoncièt, un pauc après sa victòria, que fariá tot çò que poiriá per crear pas d’instabilitat financièra. Pasmens prometèt de se manténer imparcial e de favorizar lo consens de totes los partits amb la tòca de “garir las feridas” causadas per la crisi.
 
Lo primièr ministre, lo socialista António Costa, s’engatgèt a ofrir una “cooperacion plena” amb lo president.
 
Marcelo Rebelo de Sousa, de 67 ans, es fòrça conegut en Portugal. Es professor d’universitat de drech, foguèt editor del jornal Expresso e es un dels comentators politics mai abituals de la television portuguesa. Foguèt deputat e ministre en divèrsas epòcas del Partit Socialdemocrata Portugués que, malgrat son nom, es un partit conservator.
 
 

 
 
 
 
 
 
 
 

---