Los occidentals semblan de mai en mai estonats per la preséncia de l’Estat Islamic (EI) dins lo nòrd d’Africa, e mai especialament en Libia. Per tant, l’aliança occidentala —qu’inclutz los Estats Units e lors aliats dins la guèrra contra la terror— es a preparar un atac frontal contra los terroristas islamics en Libia.
 
E mai s’encara an pas decidit quand se farà aquel atac, de fonts de l’administracion estatsunitenca —que trabalhan dempuèi de setmanas, amb de representants franceses, angleses e italians— ja an reconegut que l’atac se farà lèu, dins qualques meses o benlèu setmanas.
 
Divèrses grops britanics e estatsunitencs d’operacions especialas, fa de meses que trabalhan en Libia per identificar los caps e las unitats de l’EI dins aquel país, e tanben identifican lors defensas. Per ara, solament an trobat una armada paurament organizada e devesida en regions e tribus. E tanben una chifra: 3000 soldats.
 
L’objectiu, doncas, ara, es d’establir una muralha en Libia contra l’expansion de l’EI en aquel país e endacòm mai. Cal evitar, solidament, la connexion dels grops libians de l’EI amb d’autres de Sahara pr’amor que seriá un fach plan perilhós lor expansion per tota l’Africa del Nòrd.
 
 
En cèrca d’una plaja
 
L’EI contraròtla uèi mai de 150 quilomètres de còsta en Libia. Aquò fa qu’un desbarcament dels aliats siá un afar malaisit. E la manca de reconeissença internacionala del govèrn installat a Tubruq es tanben un fach qu’ajuda pas als aliats.
 
“Volèm partir lèu, mas las causas las cal far ben”, çò confirmèt lo general estatsunitenc Dunford. “Coneissèm perfièchament quala es la situacion de Daish [l’EI] en Libia e per tant avèm demandat als nòstres caps militars de trobar un camin per poder atacar los terroristas libians dins la quita Libia”.
 
Tot aquò se passa après que se sàpia que diferents caps militars de l’EI son arribats en Libia pendent los darrièrs meses. Demest eles i a Abu Al Anbari, un ancian oficièr de l’armada iraquiana de Saddam Husayn, considerat plan perilhós, qu’arribèt l’an passat, çò confirman d’oficièrs estatsunitencs de l’intelligéncia.
 
Amb el, e pendent 2015 e 2016, son arribats en Libia de nauts oficièrs de l’EI venguts de Siria e d’Iraq. Ansin divèrses oficièrs d’intelligéncia dels diferents païses que compausan l’aliança occidentala ja an avertit que la situacion en Libia es de mai en mai perilhosa e que cal, doncas, intervenir lèu. Pr’amor que los islamistas en Libia son los mai perilhoses e que lor territori contunha de créisser a cha jorn.
 
“Daish profiècha que la situacion politica e militara en Libia es plan marrida per far créisser lo sieu califat. An l’avantatge d’una situacion qu’ara encara pòt venir pièger e, donc, cal agir militarament, e lèu”, çò diguèt Nicholas J. Rasmussen, director del Centre Antiterrorista Nacional dels Estats Units.
 
Lo passatge en Libia serà doncas lo pas que ven dels occidentals dins lor lucha contra la terror islamista. Se sap pas encara se se farà a travèrs d’atacs d’aviacion o a travèrs de la conquista terrèstra. E tanpauc se sap pas quora se farà. Mas serà, segur, dins las setmanas que venon.
 
 
 
 
Christian Andreu

---