Actualitats
Salardú acuelh Eth Petit Hestivau, un cicle de musica sus eth pianofòrte e era votz ena epòca deth Classicisme e es inicis deth Romanticisme
Aurà lòc eth 18 e eth 19 d’agost ena glèisa tardoromanica de Sant Andrèu. S’impartirà tanben un talhèr de cant es dies 17, 18 e 19 d’agost en Otèl deth País.
Salardú (Val d’Aran) serà eth scenàri dera prumèra edicion de ’Eth Petit Hestivau’. Un cicle de musica dedicat, enguan ath pianofòrte, er antecessor deth piano, e ara votz ena epòca deth Classicisme e es inicis deth Romantisicme. Eth Hestivau se celebrarà es dies 18 e 19 d’agost ena glèisa de Sant Andrèu (s.XIV), un des temples mès subergessents deth Pirenèu, ena transicion entre eth romanic e eth gotic.
Eth concèrt sus “Era sonata classica damb pianofòrte” daurirà eth cicle musicau dera man deth pianofortista Roger Illa, eth pròplèu dissabte, 18 d’agost, entàs 20h00. Illa serà acompanhat eth dimenge peth baritòn Pablo Acosta, ena madeisha glèisa, a on es dus amassa aufriràn un nau concèrt dedicat ara sehnsucht, era nostalgia ena cançon deth prumèr Romanticisme alemand, tanben Lieder de Schubert, Reichardt e Beethoven (dimenge 19 d’agost, entàs 19h00).
Aguest programa a estat fòrça ben acuelhut en eveniments coma es concèrts d’ostiu deth Musèu Nacionau d’Art de Catalonha e ena sala Musitekton de Barcelona. En finalizar era serada, es interprèts, formadi ena Escola Superior de Musica de Catalonha (ESMUC), participaràn en un dialòg dubèrt ath public sus era tematica deth concièrt.
Aguest format innovador de hestivau, autogerit e economic entara administracion, nèish entà contribusir a un cambi de modèu culturau e entà preservar er accès ara cultura de qualitat en tempsi de crisi. Eth cicle compde damb eth supòrt e era collaboracion der Otèl deth País, der Ajuntament deth Naut Aran e der Archiprestat dera Val d’Aran.
Ath delà, en parallèl ath Hestivau, eth baritòn Pablo Acosta amiarà a tèrme un talhèr de cant centrat en lenguatge dera votz. Aguest cors, qu’aurà lòc es dies 17, 18 e 19 d’agost en Otèl deth País, se dirigís especiaument a estudiants o aficionadi ath cant damb un nivèu iniciau o miejan e entà quinsevolh persona interessada en mielhorar era sua condicion vocau.
Mès informacion per e-mail o ath telefon +34 620 136 091 (Pablo Acosta).
Eth Petit Hestivau
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari