Los parlamentaris reclaman a Ankara que salve 23 personas emmuradas jos una bastissa. La Fondacion dels Dreches Umans de Turquia responsabiliza l’estat turc d’una partida de las mòrts civilas dins lo conflicte.

Tres deputats del Partit Democratic dels Pòbles (HDP), qu’es majoritàriament curd, comencèron dijòus passat una cauma de la fam amb la tòca d’exigir al govèrn turc qu’assistisca 23 personas blocadas jos una bastissa a Cizre (Kurdistan del Nòrd, estat turc) dempuèi lo 23 de genièr passat, segon çò que raportèron de fonts del partit. La cauma de la fam coïncidís amb la decision d’Ankara d’espandir lo cobrifuòc a cinc districtes nòus de la capitala nòrd-curda, Amed (Diyarbakır en turc).
 
Los deputats son lo copresident del grop parlamentari de l’HDP, Idris Baluken; la covicepresidenta del partit, Meral Danis Bestas; e l’èx-primièr cònsol d’Amed, Osman Baydemir. Los tres politicians decidiguèron de començar aquela protèsta après que foncionèron pas las negociacions amb lo Ministèri de l’Interior per que las fòrças de seguretat turcas permetèsson a las ambulàncias d’arribar fins a l’endrech. Baluken, Bestas e Baydemir dison que mantendràn la cauma fins que las 23 personas seràn salvadas e aculhidas en un espital.
 
Lo desastre d’aquela bastissa es solament una mòstra de mai de la destruccion que patisson fòrça vilas nòrd-curdas a causa del conflicte entre las fòrças armadas turcas, d’un costat, e las guerrilhas restacadas al Partit dels Trabalhadors de Curdistan (PKK), de l’autre. Dimars passat, l’armada turca afirmèt aver tuat 11 guerrilhièrs curds a Cizre e d’autres 9 a Amed, e admetèt aver perdut 3 soldats en aquela darrièra vila. Dimècres passat las guerrilhas tuèron d’autres 4 soldats e policièrs a Amed.
 
Las autoritats turcas decidiguèron dimècres passat d’espandir lo cobrifuòc qu’èra ja en vigor al districte de Sur, a Amed. Ankara ditz qu’a de besonh de poder agir dins mai de zònas d’Amed perque los guerrilhièrs i son fòrts e i contraròtlan los quartièrs. Segon Associated Press, la mesura a provocat la fugida d’almens 2000 personas. S’apondon a las mai de 100 000 que se tròban desplaçadas al Curdistan del Nòrd après sièis meses de combats, segon las donadas dels activistas locals raportadas per Ara News.
 
Segon de donadas de la principala guerrilha del Curdistan del Nòrd (HPG), l’an passat lo conflicte daissèt 1600 mòrts demièg las fòrças armadas turcas e 220 demièg las guerrilhas. Aquelas donadas son entièrament opausadas a las qu’a publicadas la presidéncia turca, que parla de 3100 guerrilhièrs mòrts e que reconeis solament 200 decèsses demièg l’armada e la polícia estatalas.
 
La Fondacion dels Dreches Umans de Turquia apond que lo nombre de civils mòrts dins los quartièrs curds ont lo cobrifuòc s’impausa s’elèva a 198 fins al 21 de genièr d’ongan. Lo rapòrt d’aquela entitat es mai que mai critic amb l’accion de l’estat turc: afirma que 40 d’aquelas personas moriguèron e mai s’èran a l’ostal e apond qu’entre l’11 de decembre e lo 22 de genièr, almens 21 civils moriguèron perque foguèron pas assistits pels servicis sanitaris “a causa del blocatge de las fòrças de seguretat”.
 
Mai de 1200 academicians turcs e d’autres païses an signat un manifèst que reclama al govèrn turc de metre fin çò que los signataris veson coma un “crime” e un “chaple deliberat e planificat” contra los “curds e d’autras gents de la region”. Lo 15 de genièr, la polícia turca arrestèt 12 dels signataris, en los acusant de  “far de propaganda per una organizacion terrorista” e “d’insultar l’estat”.
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion.
 
 
 
 
 
 
 
 
 

---