La 19a edicion de la Dictada Occitana s’es convocada ongan dins mai d’un quarantenat de vilas de pertot dins lo país e tanben a París e als Païses Catalans. La majoritat de las convocacions d’aquel concors ortografic de la lenga occitana se debanèron dissabte passat simultanèament amb una participacion plan nombrosa.
 
La Dictada nasquèt en 1998 d’una iniciativa del Centre Occitan de Castras (Castrés) e d’an en an d’autras municipalitats an jongut l’eveniment.
 
 
Estrambòrd en Gasconha Tolosana
 
En Tolosan la dictada se debanèt ongan del costat gascon de Garona. Las vilas de Sant Lis, Murèth e Carbona s’amassèron a l’Escòla Aigabèra qu’aculhís una seccion bilingüa e i  participèron 60 personas dont 20 mainatges.
 
Es de notar tanben la preséncia de fòrça ensenhaires d’occitan del CRÈO per far la correccion plan rapida. L’an que ven, l’Isla de Baish aculhirà per lo primièr còp la dictada amb lo sosten de las associacions occitanistas localas e de la comuna.
 
 
D’animacions a Narbona
 
A Narbona la Dictada l’aculhiguèt la sala de las fèstas del Palais del Trabalh dins l’encastre d’un eveniment amb un programa ric e ben organizat. I participèron un quinzenat d’escolans e un seissantenat d’adultes.
 
L’eveniment comptèt amb d’animacions musicalas e un aperitiu manjadrech.
 
 
Recòrd de participants e de sostens a Barcelona
 
A Barcelona lo nombre de participants faguèt tanplan lo recòrd. La sala de conferéncia del Departament de la Cultura de la Generalitat de Catalonha aculhiguèt mai d’un centenat de personas, dont 96 participèron a la Dictada.
 
D’autoritats politicas e lingüisticas que trabalhan per la lenga èran presentas dins un eveniment organizat pel Comitat d’Afrairament Occitanocatalan (CAÒC) amb lo sosten del govèrn catalan, de l’Institut d’Estudis Araneses (IEA-AALO), de qualques ostals d’edicion e quitament de las cervesas Moritz qu’etiquetan en occitan per Aran.
 
La Dictada se debanèt tanben al País Valencian (Albocàsser e Valéncia) e a l’illa de Malhòrca.

---