Vilaweb publiquèt ièr una entrevista de Mireia Boya, la deputada occitanista al Parlament de Catalonha, qu’es tanben collaboradora de Jornalet. Presidenta del grop parlamentari de la CUP, Boya mòstra son engatjament per la nacion occitana e per l’integracion d’Aran dins la nòva republica amb dignitat: “Catalonha deu èster exemplara e deu hèr era melhora aufèrta possibla entà qu’eth pòble aranés contunhe a on ei. Un còp decidit açò, ja ac veiram”, çò ditz. “Era naua republica se deu nomentar Republica de Catalonha e Aran. Per ua arrason fòrça simpla. Actuauments eth territòri de Catalonha ei format per dus bocins de dues nacions qu’encara non an eth sòn estat. Catalonha ei un bocin des Païsi Catalans e Aran ei un bocin dera nacion occitana"
 
Boya explica atanben l’estat e lo foncionament de son grop parlamentari, son prètzfach per l’independéncia e sustot per la politica sociala. En mai d’aquò, explica son contacte e engatjament amb l’occitanisme en general: “Òc, qu’ei vertat que d’ençà que sò en parlament, m’an contactat fòrça associacions occitanes deth costat francés; que ven en tot aquerò un cèrt ressorgiment der occitanisme o aumens un senhau mès public. Jo se pogui anarè tà visitar-les a totes pr’amor que compreni qu’ei important dar visibilitat a un sentiment nacionau qu’encara ei fòrça amagat.”
 
Podètz legir tota l’entrevista en occitan sul sit de Vilaweb e ne trobaretz çai jos un petit extrach en vidèo.
 
 

Mireia Boya: 'La CUP tornarà a enamorar'per vilawebtv

---