Un desenat de suspèctes venon d’èsser arrestats al quartièr de Montaudran de Tolosa dins una vasta operacion policièra emplegant aperarquí 150 policièrs e un elicoptèr. Son suspèctes del violament de doas joventas, que las forcèron un desenat d’òmes dins la nuèch del 23 al 24 de genièr.
 
Las doas victimas, de 19 e 20 ans, èran a far fèsta per carrièras e avián l’intencion de contunhar la serada dins una granda discotèca a l’exterior de la vila, al Bowling de Montaudran. La discotèca lor refusèt l’intrada a causa de lor embriaguesa, e acceptèron l’invitacion de dos gojats que las menèron dins un veïcul ont foguèron violadas per un desenat d’òmes durant qualques oras. Puèi, las victimas anèron far lor denóncia a la polícia en estat de chòc.
 
A menat l’enquèsta la brigada criminala e de repression d’atacs a las personas (BCRAP) de Tolosa, qu’a identificat un desenat d’òmes de 18 a 27 ans. Segon los policièrs, totes son de membres de la comunautat de las gents del viatge. Cinc son estats interpelats a Auloron (Bearn) e los autres dins un camp de nomadas près de la Ciutat Mondina. S’espèra las analisis de l’ADN.
 
Segon La Dépêche, lo comissariat de Tolosa fa fàcia a de nombroses afars de violéncias sexualas en enregistrant aperaquí 300 denóncias per de viòls. Segon Osez le Féminisme, cada an, 75 0000 femnas son violadas dins l’estat francés.
 
 
“Èrsa” d’agressions sexualas en Euròpa
 
Dempuèi la nuèch del Cap d’An, los mèdias consagran lors informacions a las agressions sexualas. Se, fin finala, los mèdias an reafirmat l’importància de denonciar los violaments dins un entorn de fèsta? O s’aqueles crimes solament s’emplegan per criminalizar cèrts segments de la populacion e per justificar cèrtas politicas racistas? La revista Pikara ne publica qualques reflexions en espanhòl, que podètz trobar traduchas en catalan dins La Directa. Mentretant, se banalizan las agressions sexualas coma o podètz veire sus l'imatge seguent, extrach d’una publicitat de Calvin Klein qu’a levat polemica e qu’es estat denonciat.
 

---